कांदा दरात घसरण, शेतकरी संतप्त ; सरकारविरोधात घोषणाबाजी

Spread the love

महाराष्ट्र २४ । विशेष प्रतिनिधी । दि. २५ ऑगस्ट । कांद्यावर ४० टक्के निर्यातशुल्क लावल्यानंतर शेतकऱ्यांना दिलासा देण्यासाठी केंद्र सरकारने दोन लाख मेट्रिक टन कांदा खरेदीचा निर्णय घेतला. मात्र सरकारी एजन्सींनी गुरुवारी अपेक्षेप्रमाणे कांदा खरेदी न केल्याने भाव कोसळले. यामुळे संतप्त शेतकऱ्यांनी बाजार समित्यांत ठिय्या आंदोलन केले. यामुळे दुपारच्या सत्रात लिलाव ठप्प झाले. शेतकऱ्यांनी रास्ता रोको आंदोलन करीत सरकारविरोधात घोषणाबाजी केली. सायंकाळच्या सत्रात लिलाव झाले, पण कमाल दोन हजार रुपये प्रतिक्विंटलच्या आसपास दर मिळाला. आज, शुक्रवारी पुन्हा दर कोसळले, तर शेतकरी आंदोलन करण्याच्या तयारीत आहेत.

सलग तीन दिवसांच्या बंदनंतर गुरुवारी जिल्ह्यातील बाजार समित्यांमध्ये सुरू झालेले लिलाव अल्पकाळच टिकू शकले. शेतकऱ्यांच्या अपेक्षेप्रमाणे नाफेडच्या कांदा खरेदीसाठी सरकारी एजन्सीज बाजार समितीत उतरल्या नाहीत. परिणामी, व्यापाऱ्यांकडून लिलावात कमी दर मिळाले. यामुळे लासलगावसह पिंपळगाव, येवला, चांदवड, उमराणे, कळवण या बाजार समित्यांमधील लिलाव पुन्हा ठप्प झाले. चांदवड आणि येवल्यामध्ये शेतकऱ्यांनी ‘रास्ता रोको’ केला. चांदवडमध्ये आंदोलक शेतकरी व कार्यकर्त्यांना पोलिसांनी ताब्यात घेतल्याने वातावरणात तणाव होता. सायंकाळच्या सत्रात लिलाव पुन्हा सुरू झाले, मात्र कांद्यास मिळणारा दर हा नाफेडच्या दरापेक्षा कमी सरासरी दोन हजार रुपयांच्या आसपास होता.

 

– गुरुवारी लिलाव सुरू होताच कांदा दरात घसरण

– आश्वासनानंतरही नाफेडच्या एजन्सी बाजार समितीत आल्या नाहीत

– शेतकऱ्यांमध्ये संतापाची लाट; चांदवड-लासलगाव-येवला समितीनजीक ‘रास्ता रोको’

– लासलगाव, पिंपळगाव, येवला, चांदवडसह सर्वच बाजार समित्यांमध्ये पुन्हा लिलाव ठप्प

– चार दिवसांत सुमारे एक अब्ज रुपयांपेक्षाही जास्त कांद्याचे लिलाव ठप्प

– आंदोलनामुळे मुंबई-आग्रा महामार्गावर दोन तास वाहतूक कोंडी

– प्रहार संघटनेचे कार्यकर्ते चांदवडला आक्रमक

– रस्त्यावर झोपणारे कार्यकर्ते पोलिसांनी घेतले ताब्यात

‘कांदा खरेदी केंद्रांची संख्या वाढवा’

मुंबई : केंद्र सरकारने नाफेडमार्फत कांदा खरेदी करण्याचा निर्णय घेतल्यानंतर राज्यात नाफेडने कांदा खरेदी सुरू केली आहेḤत. सध्या नाफेडच्या १३ खरेदी केंद्रांवर कांदा खरेदी केला जात आहे. मात्र ही खरेदी केंद्र अपुरी पडत आहेत. त्यामुळे राज्यात कांदा खरेदी केंद्रांची संख्या वाढविण्यात यावी, अशी मागणी मुख्यमंत्री एकनाथ शिंदे यांनी केंद्रीय कृषी मंत्री आणि केंद्रीय वाणिज्य मंत्री यांना गुरुवारी पत्र लिहून केली.

Leave a Reply

Your email address will not be published. Required fields are marked *