महाराष्ट्र २४ ।। विशेष प्रतिनिधी ।। दि. ४ जुन ।। बहुचर्चित सांगली लोकसभेच्या मतमोजणीकडे संपूर्ण राज्‍याचे लक्ष लागून राहिले आहे. अपक्ष उमेदवार विशाल पाटील यांना आघाडी मिळाल्यानंतर काँग्रेस कमिटी जवळ विशाल पाटील समर्थकांनी गुलालाची उधळण करत जल्लोष करण्यास सुरुवात केली आहे. चौथ्या फेरी अखेर अपक्ष उमेदवार विशाल पाटील आघाडीवर आहेत.
सांगली लोकसभा मतदारसंघात चौथ्या फेरीची मतमोजणी सुरू झाली असून चौथ्या फेरी अखेर अपक्ष उमेदवार विशाल पाटील 20 हजार 327 मतांनी आघाडीवर तर भाजपचे विद्यमान खासदार संजय पाटील यांना प्रचंड मोठा धक्का बसताना दिसून येत आहे. ते पिछाडीवर दिसत आहेत.
जागावाटपापासून ते उमेदवारी मिळण्यापर्यंत राज्यात बहुचर्चित आणि सतत वादग्रस्त ठरलेल्या सांगलीचा खासदार आज ठरेल. महायुतीचे उमेदवार, भाजपचे विद्यमान खासदार संजय पाटील की, काँग्रेसचे राज्य उपाध्यक्ष असलेले; पण अपक्ष म्हणून निवडणूक लढविलेले उमेदवार विशाल पाटील यांच्यापैकी मतदार कोणाला विजयाची माळ घालणार, याचा फैसला आज होणार आहे.