🎬 Supreme Court On Multiplex Rates: “पाण्याची बॉटल 100, कॉफी 700!”; न्यायालयाचा इशारा — “अशीच परिस्थिती राहिली तर थिएटर्स रिकामे होतील!”

✍️ महाराष्ट्र २४ | विशेष प्रतिनिधी | दि. ७ नोव्हेंबर २०२५ | मल्टिप्लेक्समधील सिनेमा तिकिटे आणि खाद्यपदार्थांच्या अव्वाच्या सव्वा दरांवरून सर्वोच्च न्यायालयाने आज मल्टिप्लेक्स चालकांना चांगलेच फैलावर घेतले.न्यायालयाने तीव्र शब्दांत सुनावताना म्हटलं — “पाण्याची बॉटल 100 रुपयांची, कॉफी 700 रुपयांची! अशी परिस्थिती कायम राहिली तर एक दिवस थिएटर रिकामे होतील!”

🎟️ पार्श्वभूमी
कर्नाटक सरकारने सिनेमा तिकिटाचे दर 200 रुपयांपर्यंत मर्यादित ठेवण्याचा निर्णय घेतला होता. मात्र कर्नाटक उच्च न्यायालयाने त्या निर्णयाला तात्पुरती स्थगिती दिली होती. त्यानंतर मल्टिप्लेक्स असोसिएशनने या आदेशाला सर्वोच्च न्यायालयात आव्हान दिले.न्यायमूर्ती विक्रम नाथ आणि संदीप मेहता यांच्या खंडपीठापुढे आज सुनावणी झाली — यावेळी न्यायालयाने मल्टिप्लेक्सवाल्यांना जाहीर इशारा दिला.

⚖️ कोर्टात काय घडलं?
न्यायालय : मल्टिप्लेक्समध्ये पाण्याची बॉटल 100 रुपयांना, कॉफी 700 रुपयांना मिळते.
अॅड. मुकुल रोहोतगी (मल्टिप्लेक्स असोसिएशनचे वकील) : ताज हॉटेलमध्ये कॉफी 1000 रुपयांना मिळते, आपण त्यांचे दर ठरवू शकतो का? हा ग्राहकांच्या चॉइसचा प्रश्न आहे.
न्यायालय : लोक आता थिएटरमध्ये कमी जातात. दर परवडतील असे असले पाहिजेत; अन्यथा थिएटर रिकामे होतील.
अॅड. रोहोतगी : रिकामे झाले तर होऊ द्या! लोक साध्या चित्रपटगृहात जाऊ शकतात, मल्टिप्लेक्सला येणं बंधनकारक नाही.
न्यायालय : साधे थिएटर्स आता उरलेच नाहीत. म्हणून तिकिटांचे दर 200 रुपयांपर्यंत मर्यादित ठेवले पाहिजेत, अशीच आमचीही भावना आहे.

💬 सरकारचं म्हणणं
कर्नाटक सरकारच्या वकिलांनी सांगितलं —
“रोख पैसे देऊन तिकीट घेणाऱ्यांना भविष्यात न्यायालयाचा निकाल सरकारच्या बाजूने लागल्यास रिफंड देता यावा, यासाठीच न्यायालयाने मल्टिप्लेक्सना प्रत्येक विकल्या गेलेल्या तिकिटाची नोंद ठेवण्याचा आदेश दिला आहे.”

🎥 थोडक्यात
मल्टिप्लेक्समध्ये खाद्यपदार्थांचे आणि तिकिटांचे दर मर्यादित ठेवण्याचा प्रश्न सर्वोच्च न्यायालयात.
न्यायालयाचा स्पष्ट इशारा — “असे दर राहिले तर थिएटर्स रिकामे होतील!”
कर्नाटक सरकारचा निर्णय : तिकिटाचे दर ₹200 च्या आत ठेवावे.
प्रकरणावर पुढील सुनावणी लवकरच होणार.