✍️ महाराष्ट्र २४ | विशेष प्रतिनिधी | दि. १८ नोव्हेंबर २०२५ | मुंबई, ठाणे आणि नवी मुंबईतील हजारो वाहनचालकांना सोमवारी मोठा फटका बसला. गॅस पाइपलाइनमध्ये बिघाड झाल्यामुळे MGL चे १६४ सीएनजी पंप बंद ठेवावे लागले. याचा परिणाम खासकरून कॅब, टॅक्सी आणि रिक्षा वाहतुकीवर झाला.
काय घडलं?
ट्रॉम्बेतील RCF परिसरात ‘गेल’च्या मुख्य गॅस वाहिनीमध्ये बिघाड झाला. त्यामुळे वडाळा येथील MGL च्या सिटी गेट स्टेशनवर पुरवठा थांबला आणि अनेक पंप बंद करावे लागले. MGL च्या ३८९ पैकी फक्त २२५ पंप सुरू होते.
दुरुस्तीची कामे सुरू
वाहिनीची दुरुस्ती प्रगतिपथावर असून १८ नोव्हेंबर दुपारपर्यंत पुरवठा पूर्ववत होण्याची शक्यता MGL ने व्यक्त केली आहे. तोपर्यंत काही पंप अजूनही बंद रहाण्याची शक्यता.
वाहतूक कोलमडली
रविवारी रात्रीपासूनच वाहनांच्या प्रचंड रांगा लागल्या. सीएनजी साठा संपल्याने मंगळवारीही वाहतुकीवर परिणाम दिसू शकतो.