✍️ महाराष्ट्र २४ | विशेष प्रतिनिधी | दि. २४ नोव्हेंबर २०२५ | नवी दिल्लीमध्ये आज भारतीय न्यायव्यवस्थेच्या इतिहासातील एक ऐतिहासिक क्षण घडला. न्यायमूर्ती सूर्य कांत यांनी देशाचे ५३ वे सरन्यायाधीश म्हणून शपथ घेतली. राष्ट्रपती द्रौपदी मुर्मू यांनी त्यांना पदाची शपथ दिली. मावळते सरन्यायाधीश भूषण गवई यांच्या सेवानिवृत्तीनंतर सूर्य कांत यांची नियुक्ती करण्यात आली आहे. ते ९ फेब्रुवारी २०२७ पर्यंत या पदावर कार्यरत राहणार असून, एकूण १५ महिने त्यांच्याकडे सर्वोच्च न्यायालयाची धुरा असेल.
सर्वोच्च न्यायालयाचे न्यायाधीश म्हणून सूर्य कांत हे अनेक महत्त्वाच्या संविधानिक प्रकरणांचे निर्णायक सदस्य राहिले—
• कलम ३७० रद्द करणे,
• अभिव्यक्ती स्वातंत्र्य,
• नागरिकत्व हक्कांवरील सुनावण्या
या सर्व गंभीर प्रकरणांत त्यांची प्रभावी भूमिका राहिली आहे.
सात देशांचे मुख्य न्यायमूर्ती उपस्थित — शपथविधीला आंतरराष्ट्रीय प्रतिष्ठा
न्यायमूर्ती सूर्य कांत यांचा शपथविधी हा अनेक बाबतीत ऐतिहासिक ठरला. कारण भारताच्या प्रमुख घटनात्मक पदाच्या शपथ समारंभाला एकाच वेळी सात परदेशी मुख्य न्यायमूर्तींची उपस्थिती प्रथमच नोंदवली गेली.
उपस्थित मान्यवरांमध्ये—
भूतान : ल्योन्पो नोरबू शेरिंग
केनिया : मार्था कूमे
मलेशिया : नलिनी पथमनाथन
मॉरीशस : बीबी रेहाना मुंगली-गुलबुल
नेपाळ : प्रकाश मान सिंह राऊत
(ब्राझील आणि श्रीलंकेचे प्रतिनिधीही कार्यक्रमासाठी निमंत्रित)
या उपस्थितीमुळे भारतीय न्यायसंस्थेच्या आंतरराष्ट्रीय प्रतिष्ठेत भर पडल्याचं तज्ज्ञांचे म्हणणं आहे.