✍️ महाराष्ट्र २४ | विशेष प्रतिनिधी | दि. २५ नोव्हेंबर २०२५ | भारत–दक्षिण आफ्रिका दुसऱ्या टेस्टमध्ये टीम इंडिया पुन्हा अडचणीत. कोलकात्यानंतर गुवाहाटीतही पराभवाचं सावट, आणि यावेळी आरोप–प्रत्यारोपांची सगळी वीज कोचकडे — गौतम गंभीरकडे. एकेकाळी हेड कोच रवी शास्त्रींवर जाहीरपणे टीका करणारे गंभीर — आता स्वतः कोचच्या खुर्चीत बसल्यावर शास्त्रींनी त्यांच्यावरच शब्दांचा बाउन्सर टाकला आहे. वेळेचं चक्र म्हणजे नक्की असतं तरी काय — हे क्रिकेट दाखवून देतं!
⚡ गुन्हा फलंदाजांचा की निर्णयांचा?
भारत तिसऱ्या दिवशी फक्त 201 धावांवर ऑलआउट. सलग दोन डावात भारताचा पासा उलटल्यावर शास्त्रींचा संयम तुटला. त्यांनी गंभीरच्या प्लेइंग इलेव्हनमधील बदलांवर सरळ प्रश्नचिन्ह लावलं.
कोलकात्यातील पराभवानंतर साई सुदर्शन आणि नीतीश रेड्डी यांना घेतलं. अपेक्षा — फलंदाजी मजबूत होईल. प्रत्यक्षात — फलंदाजी तुटली. साई सुदर्शनला सामील करण्यासाठी बॅटिंग ऑर्डर हलली आणि वॉशिंग्टन सुंदर आठव्या क्रमांकावर ढकलला गेला. हेच शास्त्रींना खास पसंत पडलं नाही.
🔥 शास्त्रींचा फटका
तिसऱ्या दिवसाचा खेळ संपताच शास्त्री म्हणाले — “याचा काही अर्थच नाही! फलंदाजी क्रमातून टीम काय साधतेय हे माझ्या डोक्यात बसतच नाही. एका सुंदरला कोलकात्यात फक्त एक ओव्हर… आणि आता तो आठव्या क्रमांकावर? असं कस चालतं?”
त्यांचा मुद्दा स्पष्ट — “वॉशिंग्टनकडे तिसऱ्या–चौथ्या क्रमांकाची क्षमता आहे. त्याला आठव्या क्रमांकावर का खाली ढकललं?” गुवाहाटीत बहुतेक फलंदाज गडगडले, पण सुंदरनं 92 चेंडूंमध्ये केलेली 48 धावांची खेळी — भारतीय डावात दीपासारखी चमकली. हेच शास्त्रींच्या प्रश्नांना अजून धार देऊन गेलं.
🎯 निष्कर्ष
क्रिकेटमध्ये चुका फलंदाजांच्या असतात, पण सवाल कोचकडे येतात — आणि रवी शास्त्री हे सवाल थेट, कडक आणि बुलंद आवाजात विचारतात.गंभीरच्या मनमानी निर्णयांवर शास्त्रींचा राग अनाठायी नाही, पण टीम इंडियाच्या या गोंधळलेल्या धोरणांचा शेवट तरी कधी?