पिंपरी-चिंचवडमध्ये आरआरआर केंद्रांचा उपक्रम; वापरण्यायोग्य कपडे, पुस्तके, खेळणी, भांडी गरजूंना देण्याचे आयुक्त डॉ. विजय सूर्यवंशी यांचे आवाहन.
महाराष्ट्र २४ ।। ऑनलाईन ।। विशेष प्रतिनिधी ।। दिवाळी आली की घराघरांत साफसफाईचा धुरळा उडतो. कपाटातील जुने कपडे, मुलांची खेळणी, पुस्तकांचे गठ्ठे, भांडी आणि फर्निचर बाहेर काढले जाते. त्यातील अनेक वस्तू कचऱ्यात फेकल्या जातात; पण दुसरीकडे याच वस्तूंची गरज असलेल्या कुटुंबांना त्या विकत घेणेही परवडत नाही. ही विसंगती दूर करण्यासाठी पिंपरी-चिंचवड महापालिकेने आरआरआर (Reduce, Reuse, Recycle) केंद्रांच्या माध्यमातून पर्यावरण संवर्धन आणि सामाजिक बांधिलकीचा उपक्रम राबवला आहे. महापालिका आयुक्त डॉ. विजय सूर्यवंशी यांनी नागरिकांना वापरण्यायोग्य वस्तू फेकून न देता या केंद्रांत जमा करण्याचे आवाहन केले आहे. स्वच्छ भारत मिशनअंतर्गत सुरू असलेल्या या उपक्रमाचा हेतू कचरा कमी करणे, वस्तूंचा पुनर्वापर वाढवणे आणि गरजूंपर्यंत उपयुक्त साहित्य पोहोचवणे हा आहे. घरातील अडगळ समजली जाणारी वस्तू दुसऱ्याच्या घरातील गरज भागवू शकते, एवढा साधा विचार नागरिकांनी स्वीकारला, तर कचऱ्याचा भारही कमी होईल आणि माणुसकीची श्रीमंतीही वाढेल.
महापालिकेचे उपायुक्त डॉ. प्रदीप ठेंगल यांनीही नागरिक आणि गृहनिर्माण सोसायट्यांना या मोहिमेत सक्रिय सहभाग घेण्याचे आवाहन केले आहे. पुस्तके, वह्या, शालेय साहित्य, सुस्थितीतील कपडे, चादरी, पडदे, खेळणी, शैक्षणिक साधने, भांडी, फर्निचर, इलेक्ट्रॉनिक उपकरणे, चपला आणि पुनर्वापर करता येणाऱ्या अन्य वस्तू केंद्रांमध्ये जमा करता येतील. मात्र, वस्तू देताना त्या स्वच्छ, सुरक्षित आणि वापरण्यायोग्य स्थितीत असणे महत्त्वाचे आहे. संकलित वस्तूंचे वर्गीकरण करून गरजूंना उपयोगी साहित्य उपलब्ध करून देणे आणि पुनर्वापरयोग्य वस्तूंचा योग्य उपयोग करणे, हा या व्यवस्थेचा मुख्य उद्देश आहे. नागरिकांनी ७०३०९०१९९३ किंवा ९१६८६८४६७० या क्रमांकांवर संपर्क साधून वस्तू जमा करण्याबाबत माहिती घ्यावी.
मोरवाडीतील कापसे उद्यान, आकुर्डी भाजी मंडई, निगडीतील संत तुकाराम महाराज उद्यान, चिंचवडमधील श्रीधरनगर उद्यान, थेरगावातील एस. के. एफ. कंपनीजवळ, रावेतमधील धर्मराज चौक, काळेवाडीतील ज्योतिबा उद्यान, अजमेरा येथील हेगडेवार क्रीडा संकुल, भोसरीतील धावडेवस्ती, मोशीतील संत सावता महाराज उद्यान, इंद्रायणीनगरातील संत ज्ञानेश्वर क्रीडा संकुल, पिंपळे सौदागरमधील लिनियर उद्यान, पिंपळे निलखमधील ज्ञानज्योती सावित्रीबाई फुले उद्यान आणि वाकडमधील तानाजी कलाटे उद्यान यांसह शहरातील विविध ठिकाणी ही केंद्रे उपलब्ध आहेत. चिखलीतील वृंदावन, रुपीनगर पोलिस चौकी, सेक्टर २१ मधील शनी मंदिर, थेरगाव रुग्णालय परिसर, पिंपरी गाव बसथांबा, रहाटणी गावठाण, संत तुकारामनगरमधील छत्रपती शिवाजी महाराज गोल मंडई, कासारवाडीतील सीतांगण उद्यान, पिंपळे गुरवमधील काळुराम जगताप जलतरण तलाव आणि सांगवी भाजी मंडई येथेही संकलनाची सुविधा नमूद आहे.
नागरिकांनी जाण्यापूर्वी संबंधित केंद्राची उपलब्धता तपासावी. दिवाळीच्या साफसफाईत वस्तू फेकण्याऐवजी दान केल्यास शहर स्वच्छ ठेवण्याबरोबरच गरजूंच्या आयुष्यातही आनंदाचा दिवा उजळू शकतो.