महाराष्ट्र २४ । विशेष प्रतिनिधी । दि. ९ जुलै । फुटबॉलविश्वात या दोन संघांवर त्यांच्या नागरिकांसह इतर देशांतील फुटबॉलप्रेमीही जीव ओवाळून टाकतात. या दोन संघांत म्हणजेच ब्राझील आणि अर्जेंटिना या संघात यंदाची कोपा अमेरिका फुटबॉल स्पर्धेची फायनल रंगणार आहे. या अंतिम लढतीवर साऱ्या फुटबॉल भक्तांचे लक्ष लागेल; कारण ब्राझीलमध्ये नेमार आणि अर्जेंटिनाकडे लिओनेल मेसीसारखे हुकमी नाणे आहे. हे दोघे प्रतिस्पर्धी म्हणून आमने सामने येणार म्हणजे फुटबॉलची मेजवानीच. भारतीय प्रमाणवेळेनुसार रविवारी पहाटे साडेपाच वाजता या अंतिम लढतीचे थेट प्रक्षेपण पाहता येईल.
रियो दी जानेरोच्या ऐतिहासिक माराकाना स्टेडियमवर या अंतिम लढतीचे आयोजन होते आहे. करोना, राजकीय उलाढाल यामुळे ऐनवेळी अर्जेंटिना, कोलंबियाकडून कोपा अमेरिका स्पर्धेचे यजमानपद काढून घेण्यात आले आणि ब्राझीलमध्ये स्पर्धा घेण्याचे ठरले. ब्राझीलकरांचा याला विरोध होता. त्यासाठी निदर्शने झाली. मात्र आता स्पर्धेतून यंदाचा विजेता मिळण्याची वेळ झाली आहे. क्लब फुटबॉल कारकिर्दीत एकत्र बार्सिलोनाचे प्रतिनिधित्व करताना नेमार आणि मेसीने चॅम्पियन्स लीग जेतेपदाची चव चाखली आहे. हे दोघे एकमेकांचे चांगले मित्र आहेत
-मेसीचे ध्येय
अर्जेंटिनाच्या मोठ्या जेतेपदात आपला सहभाग असावा असे मेसीचे ध्येय आहे. याआधी त्याला अशी संधीही खूपवेळा लाभली आहे; पण पदरी उपविजेतेपदाशिवाय दुसरे काहीच पडले नाही. कोलंबियाविरुद्धची उपांत्य फेरी जिंकल्यानंतर मेसी म्हणाला होता की, ‘अर्जेंटिनाला जेतेपद पटकावून देणे हे माझे सर्वात मोठे ध्येय आहे. आपण सगळेच मोठी स्वप्न बघतो आणि ती साकार करण्यासाठी प्रयत्न करत राहतो’.
-नेमार अन् ब्राझील
२०१९मध्ये ब्राझीलने पेरूला १-० असे नमवून कोपा अमेरिका स्पर्धा जिंकली त्यावेळी दुखापतीमुळे नेमार खेळू शकला नव्हता. यंदा मात्र नेमार फिट असून फायनलमध्ये अर्जेंटिनासारख्या संघाविरुद्ध खेळणे आवडेल, अशी इच्छाही त्याने आपल्या उपांत्य फेरीनंतर व्यक्त केली होती.
आमने-सामने
अर्जेंटिना व ब्राझील हे संघ शंभरपेक्षा जास्तवेळा एकत्र आले आहेत; पण अंतिम फेरीत त्यांची टक्कर चारचवेळा झाली आहे. १९३७मध्ये अर्जेंटिनाने दक्षिण अमेरिकी अजिंक्यपद फायनलमध्ये ब्राझीलवर २-० असा विजय मिळवला होता. त्यानंतर २००४च्या कोपा अंतिम फेरीत ब्राझीलने पेनल्टी शूटआऊटवर अर्जेंटिनावर मात केली होती. एकवर्षानंतर जर्मनीत पार पडलेल्या कन्फेडरेशन कप अंतिम फेरीत ब्राझीलने अर्जेंटिनाचा ४-१ असा धुव्वा उडवला होता. तर २००७मध्ये पार पडलेल्या कोपाच्या अंतिम फेरीत ब्राझीलने अर्जेंटिनावर ३-० असा विजय मिळवत जेतेपदाचा मान संपादला होता.
१)गतविजेते ब्राझील आणि अर्जेंटिना या दोघांनी एकूण सात वर्ल्ड कप आणि २३ कोपा अमेरिका स्पर्धा जिंकल्या आहेत.
२)अर्जेंटिनाला १९९३नंतर मोठी स्पर्धा जिंकता आलेली नाही. मेसीचा सहभाग असताना २००७, २०१५ आणि २०१६मध्ये अर्जेंटिनाचा कोपाच्या फायनलमध्ये पराभव झाला आहे.
३)मेसी संघात असतानाही अर्जेंटिनाला जर्मनीविरुद्ध वर्ल्ड कपच्या फायनलमध्येही पराभवाचा सामना करावा लागला होता.