महाराष्ट्र २४ । विशेष प्रतिनिधी । दि. १९ ऑगस्ट । सलग 31 दिवस दर स्थिर राहिल्यानंतर डिझेलच्या भावात किंचित का होईना पण घसरण सुरु झाली आहे. गुरुवारी सलग दुसऱ्या दिवशी डिझेलच्या भावात घसरण पाहायला मिळाली. पेट्रोलियम कंपन्यांनी जाहीर केलेल्या नव्या दरपत्रकानुसार डिझेल 20 पैशांनी स्वस्त झाले आहे. मात्र, पेट्रोलचे दर अद्याप जैसे थे आहेत. परंतु, डिझेलच्या दरात अशीच घसरण सुरु राहिल्यास पेट्रोलचे दरही खाली येतील, असा अंदाज बांधला जात आहे.
पेट्रोलियम कंपन्यांनी गुरुवारी जाहीर केलेल्या आकडेवारीनुसार मुंबईत डिझेल 20 रुपयांनी स्वस्त झाले असून आता प्रतीलिटर डिझेलसाठी 97.04 रुपये मोजावे लागत आहेत. तर पेट्रोलचा दर प्रतिलीटर 107.83 रुपये इतका आहे. दिल्लीत प्रतिलीटर पेट्रोलसाठी 101.84 तर एका लीटर डिझेलसाठी 89.47 रुपये मोजावे लागत आहेत.
दररोज सकाळी 6 वाजता पेट्रोल आणि डिझेलच्या किमतीत बदल होत असतो. सकाळी सहा वाजता नवे दर लागू केले जातात. पेट्रोल आणि डिझेलच्या किमती एक्साइज ड्युटी, डिलर कमिशन आणि अन्य गोष्टी जोडल्यानंतर त्याचा भाव जवळपास दुप्पट होतो.