महाराष्ट्र २४ । विशेष प्रतिनिधी । दि .२८ जानेवारी । छोट्या पडद्यावरील लोकप्रिय अभिनेत्री श्वेता तिवारी ही वादग्रस्त वक्तव्य केल्याप्रकरणी सध्या चर्चेत आहे. या वक्तव्यामुळे धार्मिक भावना दुखावल्याप्रकरणी श्वेताच्या विरोधात भोपाळ येथे गुन्हा दाखल झाला आहे. मात्र, याप्रकरणी आता श्वेता तिवारी हिने सपशेल माफी मागितली आहे. तसेच तिने याप्रकरणी तिची बाजू देखील मांडली आहे.
गेल्या काही दिवसांपासून चर्चेत असलेल्या याप्रकरणी अभिनेत्री श्वेता तिवारी हिने एका निवेदन प्रसिद्ध केले आहे. या निवेदनात तिने म्हटले आहे की, ‘ मला कुणाच्याही धार्मिक भावना दुखवायच्या नव्हत्या. मी जे काही बोलले त्याचा विपर्यास करून ते मांडले आहे. मात्र तरी देखील मी सर्वांची माफी मागते.’ श्वेता तिवारीने तिच्या निवेदनात पुढे लिहिले आहे की, ‘ एका सहका-याशी बोलत असताना मी केलेल्या विधानाचा चुकीचा अर्थ लावत, त्याचा विपर्यास करत ते मांडले आहे. मी हे वक्तव्य करताना, सौरभ राज जैन यांनी साकारलेल्या देवांच्या लोकप्रिय पात्रासाठी मी ‘भगवान’ हा शब्द वापरला आहे. लोक अनेकदा एखाद्या अभिनेत्याचे नाव त्याच्या पात्राशी जोडत असतात. त्या परिस्थितीत मी देखील हेच उदाहरण देऊन माध्यमांशी संवाद होते.’
श्वेता तिवारीने या निवेदनात पुढे लिहिले आहे की, ‘परंतु माझ्या विधानाचा विपर्यास करण्यात आला. ही गोष्ट खूप दु:खद आहे. माझी स्वतःची देखील देवावर खूप श्रद्धा आहे. त्यामुळेच एक आस्तिक म्हणून, भक्त म्हणून माझ्याकडून जाणूनबुजून किंवा इतर कोणत्याही प्रकारे असा प्रकार होणे शक्य नाही. नकळतसुद्धा एखाद्याच्या भावना दुखावणारे कृत्य मी करणार नाही. मात्र तरी देखील माझ्या बोलण्याने किंवा माझ्या कृतीने, कोणाच्याही भावना दुखावल्या गेल्या आहेत. त्यामुळे मी सर्वांची माफी मागते.’