महाराष्ट्र २४ ।। विशेष प्रतिनिधी ।। दि. १८ सप्टेंबर ।। मनोज जरांगे पाटील यांनी पुन्हा उपोषणाला सुरुवात केली असून आक्रमक पवित्रा घेतला आहे. सरकारने मनोज जरांगे पाटील यांना सहकार्य करण्याचं आव्हान केलं आहे परंतु मनोज जरांगे पाटील यांनी पुन्हा सरकारला धारेवर धरले आहे. आमच्या मागण्या त्वरित मान्य कराव्यात अन्यथा नाहीतर सर्वांचं राजकीय करियर उद्ध्वस्त करणार, असा इशाराच जरांगे पाटील यांनी दिला. तर आता सुद्धा जरांगेंनी देवेंद्र फडणवीसांवर निशाणा साधला आहे.
भारतात अशी जात नसेल ज्यांनी वर्षभर सरकारला सहकार्य केलं, पण ती मराठा जातच आहे जिने सहकार्य केलं आहे. आम्हालाही काहीतरी मर्यादा आहेत, आमच्यावर समाजाची काही जबाबदारी आहे. आम्ही वर्षभर तुम्हाला मदत आणि सहकार्य करतच आहोत तरीसुद्धा तुम्ही सहकार्यच करा म्हणत असाल तर कोणते सरकार तुम्ही चालवता आणि कशाला चालवतात? असा संतप्त सवाल जरांगे यांनी उपस्थित केला आहे. आम्ही आणखी किती दिवस सरकारला सहकार्य करायचं? फडणवीसांचं ऐकून काय मराठा समाज संपवून टाकायचा आहे का, असेही जरांगे म्हणाले आहेत.
फडणवीस साहेब मी तुम्हाला प्रामाणिकपणाने सांगतो सगळ्या मागण्यांची अंमलबजावणी करा. मुख्यमंत्र्याच्या पोटात काही नाही म्हणत आहेत तर आम्हीही काही वेगळं म्हणत नाही म्हणूनच वर्षभर आम्ही सहकार्य केलं. अजून किती दिवस करायचं, निवडणुका आहेत त्यामुळे तुमचा पोळा जवळ आला आहे. सध्या मी राजकीय बोलणार नाही मात्र नंतर सगळ्यांचाच हिशोब करतो, असं आव्हानच जरांगे पाटील यांनी सत्ताधाऱ्यांना दिले आहे.
धनगरांसह मुसलमानांच्या आरक्षणात देखील फडणवीसंचा अडथळा होता. शेतकरी आणि गोरगरीब ओबीसींच्या, मराठ्यांच्या प्रश्नामध्ये देखील हेच अडथळा निर्माण करत आहेत. येथे तर सरपंचाचा काही उपयोगच नाही कारण सध्या उपसरपंच सर्व कारभार हाकत आहे, देवेंद्र फडणवीसच सर्व कारभार पाहतात, सरपंचाच्या हातात काही नाही, अशी खोचक टीकाही जरांगे यांनी केली आहे.
येत्या चार दिवसांत आमचा विषय संपवा आणि सगेसोयरेची तात्काळ अंमलबजावणी करा, अन्यथा २०२४ला आमच्या नावानं ओरडत बसायचं नाही. मग फडणवीसांनी कितीही गणित करू द्या, मी त्यांची सगळी गणितं फेल करणार, असा एल्गारच जरांगे पाटील यांनी केला आहे. त्यामुळे विधानसभा निवडणुकीच्या तोंडावर आरक्षणाचा मुद्दा तापण्याची शक्यता आहे.