महाराष्ट्र २४ ।। विशेष प्रतिनिधी ।। दि. २७ सप्टेंबर ।। गेल्या दोन दिवसांपासून होत असलेल्या जोराच्या पावसामुळे पंतप्रधान नरेंद्र मोदी यांचा दौरा गुरुवारी पुढे ढकलण्यात आल्यानंतर अखेर रात्री उशिरा मेट्रो लोकार्पणाचा कार्यक्रम येत्या रविवारी (२९ सप्टेंबर) ‘ऑनलाइन’ स्वरूपात होणार असल्याचे जाहीर करण्यात आले. पंतप्रधान नरेंद्र मोदी यांनी दिल्लीतून पुण्यातील ‘सी-डॅक’च्या प्रकल्पाचे गुरुवारीच लोकार्पण केल्याने मेट्रोसाठी आणखी दोन दिवस वेळ का लावला, असा प्रश्न नागरिकांना पडला आहे.
शहर आणि परिसरात झालेल्या जोरदार पावसामुळे स. प. महाविद्यालयाच्या मैदानावर पूर्ण चिखलाचे साम्राज्य पसरले होते. प्रशासनाने प्रयत्नांची शर्थ करूनही हे मैदान सभा घेण्यायोग्य स्थितीत नव्हते. हवामान विभागाने गुरुवारीही जोरदार पावसाचा अंदाज वर्तविल्याने पंतप्रधान आणि सभेसाठी येणाऱ्या नागरिकांच्या सुरक्षेच्या दृष्टिकोनातून मोदी यांचा गुरुवारचा दौरा पुढे ढकलण्यात आल्याचे सकाळी जाहीर करण्यात आले. मोदी यांचा दौरा पुढे गेल्याने जिल्हा न्यायालय ते स्वारगेट दरम्यानच्या मेट्रोचे उद्घाटन आणि स्वारगेट-कात्रज मार्गिकेच्या भूमिपूजनाचा कार्यक्रम पुढे गेला.
दरम्यान, मोदी यांचा दौरा रद्द होऊन मेट्रोचे उद्घाटन लांबणीवर टाकण्यात आल्याने त्याबाबत समाजमाध्यमांसह सर्वसामान्य नागरिकांमध्ये नाराजीचा सूर उमटला. प्रवाशांसाठी सर्व सुविधा सज्ज असताना, आधीच विलंब झालेला हा प्रकल्प आणखी किती लांबणीवर टाकणार, अशी चर्चा सुरू झाली. राज्य परिवहन (एसटी) बससेवा आणि पुणे महानगर परिवहन महामंडळाच्या (पीएमपी) बस स्थानकांना जोडणारे स्वारगेटच्या मेट्रो स्थानकासाठी पुणेकरांना खूपच प्रतीक्षा करावी लागली होती. त्यामुळे हे उद्घाटन तातडीने करावी, अशा प्रतिक्रिया उमटत होत्या. त्यानंतर, रात्री उशिराने उद्घाटन-भूमिपूजनाचा कार्यक्रम रविवारी ऑनलाइन स्वरूपात घेण्यावर शिक्कामोर्तब करण्यात आले.
‘जोरदार पावसामुळे पुणेकरांना त्रास होऊ नये, यासाठी गुरुवारचा कार्यक्रम पुढे ढकलण्यात आला होता. स्वारगेटपर्यंतच्या मेट्रोचे लोकार्पण, कात्रज मार्गाचे भूमिपूजन आणि सोलापूर विमानतळाचे उद्घाटन असे तिन्ही कार्यक्रम येत्या रविवारी (२९ सप्टेंबर) केले जाणार आहेत. त्याची वेळ लवकरच निश्चित केली जाईल.
