महाराष्ट्र २४ ।। विशेष प्रतिनिधी ।। दि. २७ मे ।।बॉलिवूडचे तीनही खान गेल्या तीन दशकांहून अधिक काळ बॉलिवूड बॉक्स ऑफिसवर सर्वाधिक कमाई करणारे अभिनेते ठरले आहेत. शाहरुख खान, सलमान खान आणि आमिर खान यांनी मिळून ८० हून अधिक हिट चित्रपट दिले आहेत. १९९४ पासून जवळजवळ दरवर्षी, त्यांचे चित्रपट सर्वाधिक कमाई करणारे बॉलिवूड सिनेमे ठरले आहेत. पण एक वेळ अशी होती, जवळजवळ एक दशकाचा कालावधी होता तो, जेव्हा या तिन्ही खान मंडळींची बॉक्स ऑफिसवरील जादू ओसरली होती. कारण एका आऊटसाईडर असलेल्या चौथ्याच हिरोने बॉक्स ऑफिसवर त्यांच्यापेक्षा जास्त कमाई करायला सुरुवात केली होती.
तो स्टार म्हणजे अक्षय कुमार. २००७ ते १९ या काळात या अभिनेत्याने बॉक्स ऑफिसवर जबरदस्त कमाई केली, ज्यामुळे तो भारतीय फिल्मइंडस्ट्रीतल्या इतिहासात सर्वाधिक कमाई करणारा बॉक्स ऑफिस स्टार बनला. अक्षयने त्याच्या कारकिर्दीत सुमारे १३० चित्रपटांमध्ये काम केले आहे, या सिनेमांनी जगभरातील बॉक्स ऑफिसवर ९००० कोटी रुपयांची कमाई केली आहे. हा आकडा तिन्ही खानांच्या कमाईपेक्षा जास्त आहे. शाहरुखच्या चित्रपटांनी जगभरात ८००० कोटी रुपयांपेक्षा जास्त कमाई केली आहे, तर सलमान ८००० कोटी रुपयांच्या कमाईसह दुसऱ्या क्रमांकावर आहे. जगभरात ६५०० कोटी रुपयांच्या कमाईने आमिर खान चौथ्या स्थानावर आहे.