महाराष्ट्र २४ | विशेष प्रतिनिधी | दि. २८ सप्टेंबर | प्रशांत महासागरात कमीदाबाचा पट्टा निर्माण (Pacific Ocean low Pressure) झाल्याने राज्यासह जिल्ह्यात अतिवृष्टी होत आहे. प्रशांत महासागरातील तापमान थंड होत आहे. महासागराचे तापमान २८ अंश से. असणे अपेक्षित असताना ते आता १५ ते २० अंशावर गेले आहे. विशेष म्हणजे मे महिन्यापासून अशीच स्थिती आहे. ही स्थिती १० ऑक्टोबरपर्यंत अशीच राहणार असल्याची माहिती डॉ. रामचंद्र साबळे (Dr. Ramchandra Sable) यांनी दिली.
कमी दाबाचा पट्टा राहण्याचा एवढा मोठा कालावधी पहिल्यांदाच निर्माण झाला आहे. प्रशांत महासागरात हवेचा कमी दाब तायर होत असल्याने बंगालच्या उपसागरात कमीदाबाची स्थिती निर्माण होत आहे. हा कमी दाबाचा पट्टा महाराष्ट्राकडे सरकत आहे. हा कमी दाबाचा पट्टा ईशान्येकडून येत आहे. यामुळे महाराष्ट्रात मोठा पाऊस पडत आहे.
आणखी दाब कमी झाल्यास काही भागात ढगफुटी होण्याची शक्यता वर्तवली आहे. यंदा प्रथमच प्रशांत महासागरात मे ते सप्टेंबर असा प्रदीर्घ कालावधी तापमान कमी होत आहे. प्रशांत महासागरातील पाण्याचे तापमान डिसेंबरपर्यंत कमी राहण्याची शक्यता आहे. जेव्हा तापमान वाढेल तेव्हा पाऊस कमी होण्याचा अंदाज डॉ. साबळे यांनी व्यक्त केला.