✍️ महाराष्ट्र २४ | विशेष प्रतिनिधी | दि. १ नोव्हेंबर २०२५ | कृत्रिम बुद्धिमत्ता (Artificial Intelligence – AI) आता केवळ महाविद्यालयीन किंवा तांत्रिक विद्यार्थ्यांपुरती मर्यादित राहणार नाही. केंद्र सरकारने देशभरातील सर्व शाळांमध्ये इयत्ता तिसरीपासूनच एआय आणि संगणकीय अभ्यासक्रम स्वतंत्र विषय म्हणून शिकवण्याचा निर्णय घेतला आहे.
हा क्रांतिकारक बदल सन २०२६–२७ शैक्षणिक वर्षापासून लागू होणार असून, डिसेंबर २०२५ पर्यंत अभ्यासक्रमाचे साहित्य, हँडबुक आणि डिजिटल संसाधने तयार केली जाणार असल्याची माहिती केंद्रीय शिक्षण मंत्रालयाने दिली आहे.
📘 केंद्रीय शिक्षण मंत्रालयाचे सचिव संजय कुमार यांनी सांगितले की, “केंद्र, राज्य आणि केंद्रशासित प्रदेशातील सर्व शाळांमध्ये एआयचा समावेश करण्यात येणार आहे. दोन वर्षांत तिसरीच्या अभ्यासक्रमात हा विषय आणण्याचे लक्ष्य आहे.”
यासाठी —
🔹 शिक्षकांना विशेष प्रशिक्षण दिले जाईल,
🔹 प्राथमिक स्तरावर स्किल इंडिया इकोसिस्टममध्ये एआयचा समावेश होईल,
🔹 आणि शिक्षण व्यवस्थेला भविष्याभिमुख बनविण्याचा प्रयत्न केला जाईल.
सध्या सीबीएसई शाळांमध्ये सहावी ते बारावीपर्यंत एआय विषय ऐच्छिक स्वरूपात शिकविला जातो. मात्र आता नॅशनल करिक्युलम फ्रेमवर्क फॉर स्कूल एज्युकेशन २०२३च्या आधारे लहान वयातच तंत्रज्ञानाशी ओळख निर्माण करण्याचा सरकारचा हेतू आहे.
एआय अभ्यासक्रम तयार करण्यासाठी आयआयटी मद्रासचे प्रा. कार्तिक रमण यांच्या अध्यक्षतेखाली समिती स्थापन करण्यात आली आहे.
👩💻 या निर्णयामुळे भारतातील शाळकरी मुलं डिजिटल अर्थव्यवस्थेच्या युगासाठी तयार होतील, आणि तंत्रज्ञान हा त्यांच्या शिक्षणाचा नैसर्गिक भाग बनेल.