🗳️ आचारसंहिता लागू, तरीही सरकारला ‘४ दिवसांची मुभा’; धोरणात्मक निर्णयांसाठी आयोगाची पूर्वपरवानगी आवश्यक 🗳️

Spread the love

✍️ महाराष्ट्र २४ | विशेष प्रतिनिधी | दि. ६ नोव्हेंबर २०२५ | राज्यातील नगरपरिषद आणि नगरपंचायतींच्या निवडणुकांसाठी आचारसंहिता लागू झाली असली, तरी राज्य सरकारला उमेदवारी अर्ज भरण्याच्या आदल्या दिवशीपर्यंत म्हणजेच ९ नोव्हेंबरपर्यंत धोरणात्मक निर्णय घेण्याची मर्यादित मुभा मिळाली आहे. मात्र अशा निर्णयांसाठी राज्य निवडणूक आयोगाची पूर्वपरवानगी घेणे बंधनकारक राहणार असल्याचे आयोगाने स्पष्ट केले आहे.

आयोगाने मंगळवारीच नगरपरिषद व नगरपंचायत निवडणुकीचा कार्यक्रम जाहीर केला. त्यानंतर राज्य सरकार वा स्थानिक स्वराज्य संस्थांच्या नियमित विकासकामांवर कोणताही अडथळा येणार नाही, असे स्पष्ट करण्यात आले. मात्र, नवीन कामे सुरू करण्यास बंदी राहील. सुरू असलेली प्रकल्पे पूर्ववत सुरू ठेवता येतील, अशी स्पष्टता आयोगाच्या सूचनांमध्ये दिली आहे.

🔹 महत्त्वाची मुदत — ९ नोव्हेंबरपर्यंत मुभा
उमेदवारी अर्ज भरण्याची प्रक्रिया १० नोव्हेंबरपासून सुरू होणार आहे. त्यामुळे ९ नोव्हेंबरपर्यंत सरकारला कोणतेही धोरणात्मक निर्णय घ्यायचे असल्यास निवडणूक आयोगाची लेखी परवानगी आवश्यक असेल. या कालावधीत घेतलेले निर्णय पारदर्शकतेच्या चौकटीत राहतील, असे आयोगाने म्हटले आहे.

🔹 पूरग्रस्तांसाठी मदत सुरूच राहणार
दरम्यान, आचारसंहिता लागू असूनही पूरग्रस्त आणि आपत्तीग्रस्तांना दिली जाणारी मदत सुरूच राहणार आहे. आपत्ती निवारण आणि नागरिकांच्या तातडीच्या गरजांशी संबंधित कामांवर कोणतीही मनाई नसल्याचेही आयोगाने स्पष्ट केले आहे.

🟠 “आचारसंहितेच्या चौकटीत सरकारचा खेळ सुरू — चार दिवसात किती ‘धोरण’ मांडता येईल, हेच आता पहायचं!”