🌸 आळंदी कार्तिकी वारीला सुरुवात; हैबतबाबांच्या पायरीपूजनाने सोहळ्याचा शुभारंभ 🌸

Spread the love

✍️ महाराष्ट्र २४ | विशेष प्रतिनिधी | दि. १२ नोव्हेंबर २०२५ | संत ज्ञानेश्वर महाराजांच्या संजीवन समाधी दिनानिमित्त भरणाऱ्या कार्तिकी वारी सोहळ्याला आज (बुधवार, ता. १२) गुरू हैबतबाबांच्या पायरीपूजनाने शुभारंभ झाला. या निमित्ताने आळंदी ‘माऊलींच्या जयघोषात’ दुमदुमली आहे.

राज्यभरातून आलेल्या वारकऱ्यांच्या हरिनामात संपूर्ण अलंकापुरी निनादत आहे. पवमान अभिषेक, दुधारती आणि माऊलींच्या चांदीच्या चलपादुकांवर महापूजा पार पडली.

सायंकाळी वीणा मंडपात योगीराज ठाकूर यांच्या वतीने मानाचे कीर्तन, तर रात्री उशिरापर्यंत विविध संत-महंतांच्या कीर्तन सेवा व जागराचे कार्यक्रम पार पडतील.

मुख्य कार्तिकी एकादशीचा सोहळा शनिवार (ता. १५) रोजी होईल. मध्यरात्री पवमान अभिषेकानंतर दुपारी माऊलींची पालखी नगरप्रदक्षिणेसाठी बाहेर पडेल. एकादशीच्या दिवशी भाविकांच्या चलपादुकांवरील पूजा बंद राहतील.

दरम्यान, सुरक्षा दृष्टीने आळंदी पोलिसांनी कसून तपासणी सुरू केली असून इंद्रायणीकाठी आणि समाधी मंदिर परिसरात कडक पहारा ठेवण्यात आला आहे.