🎓 इंजिनीअरिंग, फार्मसी आणि एमबीए सीईटी वर्षातून दोनदा; एप्रिल आणि मेमध्ये परीक्षा

Spread the love

✍️ महाराष्ट्र २४ | विशेष प्रतिनिधी | दि. १२ नोव्हेंबर २०२५ | राज्यातील इंजिनीअरिंग, फार्मसी, कृषी, बी. प्लॅनिंग आणि एमबीए अभ्यासक्रमांसाठीची सीईटी परीक्षा आता वर्षातून दोनदा घेण्यात येणार आहे.ही महत्त्वाची घोषणा उच्च व तंत्रशिक्षण मंत्री चंद्रकांत पाटील यांनी केली.

पहिली परीक्षा एप्रिल २०२६ मध्ये तर दुसरी मे २०२६ मध्ये होईल. राष्ट्रीय स्तरावरील JEE परीक्षेच्या धर्तीवर विद्यार्थ्यांना दोन संधी देण्यात येणार आहेत. दोन्ही वेळा परीक्षा देणाऱ्या विद्यार्थ्यांचा सर्वाधिक गुण असलेला निकाल प्रवेशासाठी ग्राह्य धरला जाईल.

मात्र विद्यार्थ्यांसाठी एक परीक्षा देणे बंधनकारक असेल, तर दुसरी ऐच्छिक राहील.

राज्य सामाईक प्रवेश परीक्षा कक्षाच्या बैठकीत हा निर्णय घेण्यात आला. बैठकीला अपर मुख्य सचिव बी. वेणुगोपाल रेड्डी, सीईटी आयुक्त दिलीप सरदेसाई आणि अन्य वरिष्ठ अधिकारी उपस्थित होते. सीईटी सेल लवकरच सविस्तर वेळापत्रक जाहीर करणार आहे.

🔹 यंदा पहिल्या टप्प्यात तीन सीईटी परीक्षा (पीसीएम, पीसीबी आणि एमबीए) दोनवेळा घेण्यात येतील.

🩺 एमबीबीएसच्या प्रवेशासाठी स्ट्रे राउंड जाहीर
सीईटी सेलने एमबीबीएस आणि बीडीएस प्रवेशासाठी स्ट्रे राउंड जाहीर केला आहे.

पसंतीक्रम भरणे : १२ ते १४ नोव्हेंबर

गुणवत्ता यादी : १४ नोव्हेंबर

प्रवेश प्रक्रिया : १५ ते १७ नोव्हेंबर

राज्यात यंदा एमबीबीएसच्या ८,४३५, तर बीडीएसच्या २,७१८ जागा आहेत.
तिसऱ्या फेरीनंतर अनुक्रमे ३८७ आणि ५०८ जागा अद्याप रिक्त असल्याची माहिती सीईटी सेलने दिली.