🥶 महाराष्ट्रात हिवाळ्याचा जोर! नाशिक-धुळ्यात तापमान घसरलं; दक्षिणेत पावसाची शक्यता

✍️ महाराष्ट्र २४ | विशेष प्रतिनिधी | दि. १२ नोव्हेंबर २०२५ | नोव्हेंबर महिन्यात महाराष्ट्रासह देशभरात हिवाळ्यानं जोर धरला आहे. उत्तर भारतातील राजस्थान, मध्य प्रदेश, जम्मू-काश्मीर, हिमाचल आणि उत्तराखंड या राज्यांतील थंडीचा कडाका आता महाराष्ट्रावरही जाणवू लागला आहे.

राज्यातील किमान तापमानात २ ते ३ अंश सेल्सिअसची घट झाली असून, पुढील २४ तास हवामान कोरडे राहण्याचा अंदाज वर्तवण्यात आला आहे.

🌡️ तापमान (कमाल / किमान – अंश सेल्सिअस)
पुणे : 29.4 / 13.4

धुळे : 30.0 / 8.0

नाशिक : 29.4 / 10.7

महाबळेश्वर : 25.3 / 12.5

कोल्हापूर : 28.7 / 16.9

मुंबई : 32.0 / 18.4

धुळे, नाशिक आणि निफाड परिसरात कडाक्याची थंडी, तर पश्चिम घाटमाथ्यावरील भागात दाट धुक्याची चादर पसरली आहे. मुंबई आणि उपनगरांमध्येही गुलाबी थंडीला सुरुवात झाली आहे.

दुसरीकडे, दक्षिण महाराष्ट्र आणि दक्षिण भारतात तापमानात चढ-उतार सुरू असून, तिथं हिवाळ्याची तीव्रता तुलनेनं कमी आहे.

राज्यातील गिरीस्थानांकडे पर्यटकांची गर्दी वाढू लागली असून, पुढील काही दिवस तापमान आणखी घसरण्याचा अंदाज आहे.

🌧️ देशभरातील हवामानाचा अंदाज
केंद्रीय हवामान विभागानुसार,

तामिळनाडू, केरळ आणि माहे येथे पुढील २४ तासांत पावसाची शक्यता,

तर हिमाचल प्रदेश आणि उत्तराखंड मध्ये हिमवृष्टी आणि शीतलहर तीव्र होण्याचा अंदाज.

मनाली आणि स्पिती खोऱ्यात हिमवृष्टी, तर नैनीताल, चमोली आणि मसूरी परिसरात तापमान आणखी घसरण्याची शक्यता व्यक्त करण्यात आली आहे.