✍️ महाराष्ट्र २४ | विशेष प्रतिनिधी | दि. १३ नोव्हेंबर २०२५ | नवी दिल्ली – दसरा-दिवाळीच्या खरेदीच्या हंगामात देशवासीयांना मोठा दिलासा मिळाला आहे. ऑक्टोबर महिन्यात किरकोळ महागाई दर फक्त ०.२५ टक्क्यांवर आला असून, हा २०१३ नंतरचा सर्वात नीचांक आहे. सप्टेंबरमध्ये हा दर १.४४% होता, तर गेल्या वर्षी ऑक्टोबरमध्ये तो ६.२१% होता.
राष्ट्रीय सांख्यिकी कार्यालयाच्या (NSO) आकडेवारीनुसार, भाज्या, धान्य आणि प्रथिनेयुक्त पदार्थांच्या किमतीत झालेल्या घसरणीमुळे महागाई कमी झाली. खाद्यान्न महागाई –५.०२% पर्यंत खाली आली, तर धान्य महागाई चार वर्षांतील सर्वात कमी पातळीवर पोहोचली.
तथापि, खाद्यतेलांच्या किमतींमध्ये वाढ कायम असून, खोबरेल तेलाच्या दरात तब्बल ९३% वाढ नोंदवली गेली. दुसरीकडे, सोने-चांदीच्या किमतींमध्ये वाढ झाल्याने या वर्गातील महागाई ३१ महिन्यांच्या उच्चांकी ५.७१% वर पोहोचली आहे.
विश्लेषकांच्या मते, सध्याचा कल पाहता रिझर्व्ह बँकेकडून व्याजदर कपातीची शक्यता वाढली आहे. जागतिक वस्तू बाजारातील नरमाई आणि जीएसटी कपातीचा परिणाम पुढील काही महिन्यांत महागाई आणखी खाली खेचू शकतो.