💬 भाकरी फिरली का काय? दोन्ही राष्ट्रवादींच्या युतीवर चर्चांना उधाण; अजितदादांचं सूचक विधान – “मी सांगितलंय, जिथं योग्य वाटेल तिथं करा…”'

Spread the love

✍️ महाराष्ट्र २४ | विशेष प्रतिनिधी | दि. १३ नोव्हेंबर २०२५ | पुणे – राजकारणात भाकरी कोणत्या बाजूला फिरते, हे सांगणं अवघडच! आणि सध्या दोन्ही राष्ट्रवादींच्या युतीच्या चर्चांवरून तेच दिसतंय. पुण्यातील कार्यक्रमानंतर पत्रकारांनी विचारलं — “दोन्ही राष्ट्रवादी पुन्हा एकत्र?”

त्यावर अजित पवार हसले… आणि म्हणाले, “मी सगळ्या कार्यकर्त्यांना सांगितलंय — जिथं योग्य वाटतं, तिथं करा!”

बस्स… एवढं ऐकल्यावर राजकीय वर्तुळात चर्चा पेटलीच!

अजितदादा पुढे म्हणाले,
“पुण्यातील पदाधिकारी, आमदार, नगरसेवक सगळे भेटले. मी त्यांना सांगितलंय — आधी चाचणी करा, मग निर्णय घेऊ. अजून महापालिकेचा कार्यक्रमही जाहीर झालेला नाही.”म्हणजे सरळ “थांबा जरा, बघू या कोणाचं वजन जास्त” असंच ना!

शरद पवारांशी चर्चा झाली का, असं विचारलं असता दादांनी नेहमीच्या शांत टोनमध्ये उत्तर दिलं —
“माझं साहेबांशी बोलणं झालेलं नाही… पण कार्यकर्ते त्यांच्या भावना मांडत असतात.”

मग एक वाक्य टाकून सगळं क्लियरच केलं —
“सगळ्या सहकाऱ्यांशी चर्चा करून युतीबाबत योग्य निर्णय घेऊ… तुम्ही काळजी नका करू.”

राजकीय व्याख्यांमध्ये याचा अर्थ — “ज्याचं राजकारण जमेल, त्याच्याशी हात मिळवू!”

आणि शेवटी अजितदादांचं सिग्नेचर डायलॉग —
“राजकारणात कुणीच कायमचा शत्रू नसतो, आणि कुणीच कायमचा मित्रही नसतो!” बस्स… एवढं म्हणताच, भाकरी कुठल्या बाजूला फिरतेय, हे लोकांना विचारायची गरजच उरली नाही.