✍️ महाराष्ट्र २४ | विशेष प्रतिनिधी | दि. १४ नोव्हेंबर २०२५ – देशाची राजधानी धुमसली आणि मग अचानक सगळ्यांना आठवलं — अरेरे! काहीतरी मोठं घडतंय बहुतेक! ज्या गृह खात्याने काळजी करायला हवी होती, ते घटना घडल्यानंतरच दचकून जागं झालं. आणि गुप्तचर संस्थांनी दिलेली माहिती मात्र अंगावर काटा आणणारी — स्फोटकांनी भरलेल्या तब्बल 32 गाड्या देशभर पसरवून एकाच वेळी बॉम्बस्फोट करण्याचा राक्षसी प्लान!
घटनेनंतर आता सगळेच धावाधाव करत आहेत —
गाड्या कुठे आहेत? कोणाने पार्क केल्या? कोणाला माहित?
उत्तर – “थांगपत्ता नाही”.
देश भयाच्या सावटाखाली, आणि उत्तरदायी यंत्रणांची अवस्था मात्र अंधाऱ्या खोलीत चाललेल्या लपंडावासारखी! लाल किल्ला हादरला, तपासात धक्के बसले – एक, दोन नव्हे तर ३२ कार!
लाल किल्ल्याजवळ फोडण्यात आलेली आय-20 तर चर्चेचा विषय होतीच. पण चौकशीत काढता काढता फोर्ड इको-स्पोर्ट, मग एक लाल ब्रेझादेखील पोलिसांच्या हाती. ही तर फक्त सुरुवात! तपासात पुढे आलं की मोट्यामोठ्या 32 कार जुनाट अवस्थेत विकत घेऊन त्यांना मोबाइल बॉम्ब बनवण्याचा डाव होता.
कारांचे इंजिन बंद, पण कटाचा इंजिन फुल स्पीडने चालू!
20 लाखांची घातक उभारणी – रसायनांचा ढिगारा सज्ज
चार डॉक्टर –
डॉ. मुझम्मिल,
डॉ. आदिल,
डॉ. शाहीन,
आणि मृत डॉ. उमर नबी.
कुठे उपचार करायचे आणि कुठे उध्वस्त करायचे – यांचं गणित फारच वेगळ्या प्रकारचं!
सर्वांनी मिळून 20 लाख उभे केले, त्यातले 3 लाख खर्चून 20 क्विंटल रसायनं – नायट्रोजन, फॉस्फरस, पोटॅशियम – वेगवेगळ्या ठिकाणांवरून आणली.
हे खत नव्हतं; हे थेट मृत्यू पेरणारा साठा होता!
दुबई कनेक्शन – धागे परदेशात पोहोचलेच
अटक आरोपी डॉ. आदिलचा भाऊ मुझफ्फर दोन महिन्यांपूर्वी पाकिस्तानमार्गे दुबईला गेला. पोलिसांचा संशय – जैश-ए-मोहम्मदशी त्याचे थेट संबंध ! आता तपास भारतातून, पाकिस्तानातून, दुबईतून – तिन्ही बाजूने चालू.
“अशी अद्दल घडवू की जग बघत राहील” – अमित शहा यांचा इशारा
केंद्रीय गृहमंत्र्यांनी दिलेला इशारा तगडा. वाक्य छोटं, पण अर्थ प्रचंड – दोषींना सवलत नाही. भारताचा बदला भयंकर असेल.
टार्गेटिंग मशीन – आठ जण, 32 ठिकाणं
तपासात समोर आलं –
प्रत्येकाला 4 ठिकाणांचे टार्गेट, एकूण 8 जण. म्हणजे 32 ठिकाणी एकाच वेळी भयानक स्फोट घडवून आणण्याचा प्लान. हे आठ जण आणखी एका साथीदारासह कामाला लागणार होते. देशाला हादरवणारं हे मिशन यंत्रणांना थोडक्यात चुकून गेले!
उमरचा शेवटचा प्रवास – डीएनएने पुरावा दिला
स्फोटात उडालेली आय-20 ही उमर नबीच चालवत होता, हे डीएनएने पटवून दिलं. मृतदेहाचे तुकडे आईच्या डीएनएशी जुळले. कारमध्ये तो एकटाच होता आणि संपूर्ण कारच त्याचा शवकपाट ठरली.
एकूण चित्र?
32 कार
20 क्विंटल रसायनं
दुबई-पाकिस्तान कनेक्शन
आठ जणांचे सुसूत्र नियोजन
आणि आपलं गृह खाते?
घटना झाल्यानंतर “अरेरे!” म्हणत धावाधाव!
देशावर संकटाचं ढग दाटलेले असताना, चौकसपणा झोपेत गेला तर परिणाम किती भयानक होऊ शकतो याचं हे जिवंत उदाहरण आहे.