✍️ महाराष्ट्र २४ | विशेष प्रतिनिधी | दि. १७ नोव्हेंबर २०२५| अमेरिकेचे अध्यक्ष डोनाल्ड ट्रम्प यांनी पुन्हा एकदा कठोर भूमिका घेत रशियन कंपन्यांशी व्यवसाय करणाऱ्या देशांना आणि कंपन्यांना कडक निर्बंध बसवण्याचा इशारा दिला आहे. पत्रकारांशी बोलताना ट्रम्प यांनी सांगितले की, रशियाशी कोणताही व्यावसायिक व्यवहार करणाऱ्यांवर मोठे आणि कठोर सॅंक्शन लादण्याची तयारी सुरू आहे.
रिपब्लिकन दबाव – इराणचाही समावेश?
ट्रम्प म्हणाले,
“हो, माझ्या कानावर आले आहे. रिपब्लिकन पक्ष रशियावरील व्यावसायिक संबंधांवर कडक निर्बंधांसाठी विधेयक आणत आहेत. यात इराणचाही समावेश होऊ शकतो. यासाठी मी आधीच प्रस्ताव पाठवला होता.”
पूर्वीचे निर्णय – रशियन तेलवर ५०% कर
यापूर्वी ट्रम्प प्रशासनाने रशियन तेल खरेदी करणाऱ्या देशांवर ५०% कर लावण्याचा निर्णय घेतला होता. या कराबाबत अद्याप अमेरिका व रशियामध्ये चर्चा सुरू असून अंतिम तोडगा निघालेला नाही.
५००% कराच्या दिशेने प्रस्ताव
रिपब्लिकन पक्षाचे प्रमुख सिनेटर लिंडसे ग्राहम यांनी आणखी कठोर भूमिका घेत रशियाकडून दुय्यम खरेदी (secondary purchases) आणि रशियन कच्च्या तेलाच्या आयातदारांवर तब्बल ५००% कर लावण्याचा प्रस्ताव विधीमंडळात मांडला आहे.
ग्राहम आणि ब्लूमेंथल यांनी दिलेल्या संयुक्त निवेदनानुसार,
“युक्रेन-रशिया रक्तपात थांबवण्यासाठी अंतिम हातोडा म्हणजे चीन, भारत आणि ब्राझीलसारख्या देशांवर शुल्क लादणे. हे देश स्वस्त रशियन तेल खरेदी करून पुतिनच्या युद्धयंत्रणेला पाठिंबा देतात.”
पुतिनची प्रतिक्रिया
दरम्यान, तीन आठवड्यांपूर्वी रशियाचे राष्ट्राध्यक्ष व्लादिमीर पुतिन यांनी स्पष्टपणे अमेरिकेला इशारा देत म्हटले होते:
“रशिया कोणत्याही परकीय दबावाखाली येणार नाही. आमच्या अर्थव्यवस्थेला त्याचा काहीही परिणाम होत नाही.”