✍️ महाराष्ट्र २४ | विशेष प्रतिनिधी | दि. २२ नोव्हेंबर २०२५ | पुणे विमानतळावर जे घडतंय ना, ते विनोद नाही… ही थेट प्रशासनाची दयनीय अवस्था आहे.दोन दिवसांत दोनदा बिबट्या दिसतो आणि विमानतळाकडे बघायला कुणी नाही! ही अवस्था पाहिली की वाटतं— बिबट्या तरी आपलं काम प्रामाणिकपणे करतोय… पण भिंत दुरुस्त करायची जबाबदारी कुणावर आहे?गुरुवारी रात्री दीडला तो पुन्हा K-4 टॅक्सीवेवर दिसला. जिथून थोड्याच अंतरावर लाखो रुपयांची विमानं ठेवलेली. देवाजी धनी—बिबट्या धावपट्टीवर आला नाही… नाहीतर विमानं नाही, काहींची शहाणपणाची धावपट्टी उडाली असती!
भिंत मोडकळीस… आणि प्रशासन झोपलेलं वन विभागाने किती वेळा सांगितलं—“भिंत तोडा, दुरुस्ती करा, बिबट्या आत शिरतोय.”
पण प्रशासनाने पत्राला गांभीर्य दिलं नाही.
असं वागतात ना तेव्हा मला एकच प्रश्न पडतो—ही भिंत दुरुस्त करायची आहे की ‘बिबट्याला VIP गेट’ ठेवायचं ठरवलंय?
विमानतळ प्रशासन म्हणजे तेच—काम होईपर्यंत शांत, आणि काम झालं तरी “आम्ही केले” म्हणताना आवाज मोठा.
वन विभागाची धडपड – प्रशासनाचा दांडा वन विभागाने पिंजरे लावले, कॅमेरे लावले, जाळ्या लावून गटारं बंद केली. म्हणजे बिबट्याचा पाठलाग नाही…
एखाद्याचा सूड उगवतायत असं वाटतंय!
पण बिबट्या हुशार आहे.माणसांच्या अफाट दुर्लक्षापेक्षा प्राण्यांचा मेंदू जास्त चांगला चालतो.तो त्या मोडकळीस आलेल्या भिंतीचा फायदा घेत पुन्हा आत येतो.
“बिबट्या एकच आहे,” असा दावा केला जातोय. अहो, एकच आहे म्हणून मोठं झालं नाही…एका बिबट्याने विमानतळ प्रशासनाचा पाय ठेचला आहे.
धावपट्टीजवळ बिबट्या म्हणजे काय? धैर्यशील वंडेकर सांगतात— “धावपट्टीजवळ बिबट्या असणं म्हणजे प्रवाशांच्या सुरक्षेला मोठा धोका!”
अहो बरोबर आहे.
विमानतळावर विमान उडतात हे आम्हाला ठाऊक होतं.पण आता तिथे बिबट्याचा रात्रीचा राउंड सुरूये… हे कुणी कल्पिलं होतं?
बिबट्याचं क्षेत्र वाढतंय – माणसांनी जंगल खाल्लं म्हणून!वन विभाग सांगतोय—“बिबट्याचं क्षेत्र वाढलयं.” नक्कीच वाढेल! माणसं शहरं वाढवतात, जंगलं कमी करतात…आणि मग जेव्हा बिबट्या मोकळा श्वास घेण्यासाठी विमानतळावर फिरतो,तेव्हा म्हणतात— “अगं बाई, बिबट्या आला!”बिबट्याचा दोष नाही. ‘विमानतळाची भिंत’ आणि ‘प्रशासनाची मेंदूभिंत’ — दोन्ही मोडकी आहेत.