✍️ महाराष्ट्र २४ | विशेष प्रतिनिधी | दि. २२ नोव्हेंबर २०२५ | पिंपरी चिंचवड महापालिकेच्या आगामी निवडणुकांसाठी प्रसिद्ध झालेल्या प्रारूप मतदार यादीत मोठा गोंधळ झाल्याचे उघड झाले आहे. प्रभाग क्रमांक 12 मधील तब्बल 1261 मतदारांची नावे यादीतून गायब झाली असून ही संपूर्ण यादी प्रभाग 1 मध्ये स्थानांतरित झाल्याचे समोर आले आहे. यामध्ये राष्ट्रवादीच्या माजी नगरसेवक पंकज भालेकर यांचे नावही गायब झाल्याने या यादीवर गंभीर प्रश्नचिन्ह उपस्थित झाले आहे.
भालेकर यांनी 2024 च्या विधानसभेतील नावे आणि सध्याच्या यादीतील फरक दाखवत निवडणूक विभागावर अव्यवहार्यपणाचे आरोप केले आहेत. “मी प्रभाग 12 मधून निवडणूक लढवण्याचा विचार करत असताना माझे नावच गायब झाले. हा प्रकार जाणूनबुजून केल्याची शंका आहे,” असे भालेकर यांनी म्हटले आहे.
विविध प्रभागांत मोठ्या प्रमाणात चुकीची नावे
प्रभागनिहाय याद्या तपासताना अनेक त्रुटी दिसून आल्या—
नावांची चुकीची नोंद
वैध मतदारांचे नावे वगळणे
एका प्रभागातील मतदारांना दुसऱ्या प्रभागात टाकणे
या पार्श्वभूमीवर नागरिक संतप्त झाले असून, विविध पक्षांच्या नेत्यांनीही निवडणूक विभागाकडे आक्षेप नोंदवले आहेत. प्रारूप यादी जाहीर झाल्यानंतर एकूण 17 हरकती पहिल्या दिवशीच प्राप्त झाल्या.
प्रभागनिहाय गोंधळाची उदाहरणे
प्रभाग 6
मोशी आणि कुदळवाडी परिसरातील मतदारांची नावे चुकीने येथे घालण्यात आली आहेत.
प्रभाग 16 व 17
काही मतदारांची नावे चुकीने प्रभाग 17 मध्ये टाकल्याची तक्रार झाली आहे.
प्रभाग 1
चिखली प्रभागातील पूर्णानगर, कृष्णानगर आणि घरकुल येथील मतदारांची नावे प्रभाग 11 मध्ये टाकल्याचे समोर आले आहे.
त्याचबरोबर इतर प्रभागांतील काही मतदारांना प्रभाग 1 मध्ये घातल्याने येथे मतदारसंख्या 74,340 इतकी झाली आहे.
सामाजिक कार्यकर्त्या योगिता रणसुभे आणि त्यांच्या कुटुंबाचे नाव प्रभाग 1 ऐवजी प्रभाग 11 मध्ये टाकण्यात आले आहे. या त्रुटींवर राष्ट्रवादी काँग्रेसचे शहर मुख्य सरचिटणीस विनायक रणसुभे यांनी नाराजी व्यक्त केली. “प्रत्यक्ष जागेवर तपासणी न झाल्याने हा गोंधळ निर्माण झाला आहे,” असे ते म्हणाले.
निवडणूक विभागावर टीका वाढली
प्रारूप मतदारयादीतील वारंवार झालेल्या चुका आणि नावांच्या बदलांमुळे येणाऱ्या निवडणुकांवरही परिणाम होण्याची शक्यता असल्याची भीती व्यक्त केली जात आहे. नागरिक आणि राजकीय नेत्यांनी निवडणूक विभागाने हा गोंधळ त्वरित दूर करावा आणि अंतिम यादीपूर्वी सर्व नोंदी अचूक तपासाव्यात, अशी मागणी केली आहे.