✍️ महाराष्ट्र २४ | विशेष प्रतिनिधी | दि. २२ नोव्हेंबर २०२५ |पुणे : राज्यातील शिक्षक पात्रता परीक्षा (TET) आता वर्षातून दोनदा घेण्याचा निर्णय राज्य परीक्षा परिषदेने घेतला आहे. जेईईप्रमाणे वर्षातून दोनदा परीक्षा घेण्याची पद्धत आता टीईटीलाही लागू होणार आहे. पुढील दोन वर्षांपुरता हा निर्णय तात्पुरता असल्याचे परिषदेचे अध्यक्ष डॉ. नंदकुमार बेडसे यांनी सांगितले. त्यामुळे आगामी दोन वर्षांत एकूण चार टीईटी परीक्षा होणार आहेत.
सध्या टीईटी परीक्षा २०२५ साली येत्या रविवारी (ता. २३) होणार आहे. पुढील परीक्षा सहा महिन्यांनी घेण्यात येईल. २०२६ मधील पहिली परीक्षा मे-जूनदरम्यान घेण्याचे नियोजन सुरू आहे.
सर्व शिक्षकांसाठी टीईटी अनिवार्य
सर्वोच्च न्यायालयाच्या आदेशानुसार इयत्ता 1 ते 8 मध्ये अध्यापन करणाऱ्या सर्व शिक्षकांसाठी टीईटी उत्तीर्ण करणे बंधनकारक आहे.
फक्त 5 वर्षे सेवा शिल्लक असलेल्या शिक्षकांना सूट देण्यात आली आहे.
इतर सर्वांना दोन वर्षांच्या आत टीईटी उत्तीर्ण करावी लागणार आहे.
त्यामुळे जास्तीत जास्त शिक्षकांना परीक्षा देता यावी म्हणून वर्षातून दोनदा परीक्षा घेण्याचा निर्णय घेण्यात आला आहे.
आधार पडताळणी अनिवार्य – गैरप्रकारांवर लगाम
टीईटीमधील गैरप्रकार रोखण्यासाठी आता परीक्षार्थींची आधार कार्डद्वारे पडताळणी केली जाणार आहे.
अर्ज करतानाच आधार प्रमाणीकरण होईल.
परीक्षाकेंद्रावरही ओळख पडताळणीसाठी आधारचा वापर केला जाईल.
ही यंत्रणा पुढील टीईटी परीक्षा (२०२६) पासून पूर्णपणे कार्यान्वित होणार असल्याचे डॉ. बेडसे यांनी सांगितले.
प्रमाणपत्रे DG Locker मध्ये उपलब्ध
टीईटीसह राज्य परीक्षा परिषदेच्या
शिष्यवृत्ती परीक्षा,
शिक्षक अभियोग्यता चाचणी (TET-TAT),
व इतर परीक्षांची प्रमाणपत्रे
डीजी लॉकरमध्ये उपलब्ध होणार आहेत. यामुळे परीक्षार्थींना सर्व प्रमाणपत्रे एकाच ठिकाणी सहज पाहता आणि डाउनलोड करता येतील.