✍️ महाराष्ट्र २४ | विशेष प्रतिनिधी | दि. ३० नोव्हेंबर २०२५ | तात्काळ तिकीट बुकिंग सुरू होतं आणि काही मिनिटांत खुर्च्यांपेक्षा कर्सर जास्त वेगाने धावत सगळा ताफा गायब! सामान्य प्रवासी रांगेत… आणि एजंट मात्र पहिल्या पाच मिनिटांत ‘फुल’ बुकिंग. या सगळ्यावर आता अखेर रेल्वेने अत्रे-शैलीत सांगायचं झालं तर — “बस, आता पुरे!”
१ डिसेंबर २०२५ पासून तात्काळ तिकीट बुकिंगमध्ये ओटीपी व्हेरिफिकेशन अनिवार्य होणार आहे. म्हणजे आता तुमचा स्वतःचा मोबाईल नंबर, तुमचाच ओटीपी आणि तुमचंच तिकीट. यातून दलाल आणि बनावट बुकिंग करणार्‍यांची एंट्रीच बंद. सुरुवातीला ही प्रणाली मुंबई सेंट्रल–अहमदाबाद शताब्दी एक्सप्रेसवर लागू होणार आहे.
रेल्वेचा उद्देश स्पष्ट — तात्काळ तिकीट खरंच ‘तातडी’च्या कामासाठीच मिळावं.
ओटीपी चुकीचा टाकला? मग तिकीट नाही! बनावट नंबर, डमी आयडी? खेळ खल्लास.
नवीन सिस्टमची सोपी भाषा:
तिकीट बुकिंग सुरू → मोबाईल नंबर टाका → ओटीपी येईल → IRCTC/अॅप/काउंटर/एजंटकडे ओटीपी नोंदवा → मगच तिकिटाची मजल पुढे.
यात ‘एक नंबर – हजार तिकिटं’ हा जुगाड सरळ संपला.
रेल्वेने जाहीर केलंय की हा नवा नियम फक्त IRCTCपुरता मर्यादित नाही.
कुठेही जा—
✔ PRS काउंटर
✔ अधिकृत रेल्वे एजंट
✔ IRCTC वेबसाइट
✔ IRCTC मोबाइल अॅप
सगळीकडे ओटीपी व्हेरिफिकेशन अनिवार्य.
एकंदरीत, आतापासून तात्काळ तिकिटात ‘पहले आओ – पहले पाओ’ नाही… तर ‘ज्याच्याकडे स्वतःचा मोबाईल आहे आणि खऱ्या अर्थाने प्रवासाचं कारण आहे, त्यालाच तिकीट’ — असे चित्र!