✍️ महाराष्ट्र २४ | विशेष प्रतिनिधी | दिनांक १२ डिसेंबर २०२५ | ३ ते ५ डिसेंबरदरम्यान इंडिगोच्या अनेक उड्डाणांना मोठ्या प्रमाणात विलंब आणि रद्द करण्याचा फटका बसला होता. यामुळे हजारो प्रवाशांचे नियोजन बिघडले आणि मोठी गैरसोय झाली. या गैरसोयीची भरपाई म्हणून इंडिगोकडून मोठी घोषणा करण्यात आली आहे. या कालावधीत प्रवास बाधित झालेल्या प्रत्येक प्रवाशाला कंपनीकडून १० हजार रुपये किमतीचे ट्रॅव्हल व्हाउचर देण्यात येणार आहे.
इंडिगोकडून देण्यात येणारी ही व्हाउचर योजना प्रवाशांसाठी मोठा दिलासा मानली जात आहे. ही ट्रॅव्हल व्हाउचर पुढील १२ महिन्यांत इंडिगोच्या कोणत्याही उड्डाणासाठी वापरता येणार आहेत. यामुळे प्रवाशांना त्यांच्या सोयीच्या वेळी नवीन प्रवासाचे नियोजन करता येणार आहे. ही व्हाउचर योजना ही डीजीसीएच्या भरपाई नियमांव्यतिरिक्त अतिरिक्त सुविधा असेल, असे कंपनीने स्पष्ट केले आहे.
डीजीसीएच्या नियमानुसार, विमान सुटण्याच्या २४ तासांच्या आत उड्डाण रद्द झाल्यास प्रवाशांना ५ ते १० हजार रुपये भरपाई देणे बंधनकारक आहे. इंडिगोने हा नियम पाळत प्रवाशांना सरकारी भरपाई देण्यासोबतच १० हजारांचे अतिरिक्त व्हाउचर देण्याचा निर्णय घेतला आहे. त्यामुळे प्रवाशांचे आर्थिक नुकसान काही प्रमाणात भरून निघण्याची शक्यता आहे.
कंपनीच्या या निर्णयाचे अनेक प्रवाशांनी स्वागत केले आहे. अचानक उड्डाण रद्द झाल्याने अनेकांनी राहण्याची सोय, ऑफिसचे नियोजन, अन्य तिकिटे आणि महत्त्वाच्या कामांचे नुकसान सहन केले होते. त्यामुळे इंडिगोने दिलेली ही भरपाई आणि ट्रॅव्हल व्हाउचर योजना प्रवासी हितासाठी महत्त्वाची पाऊल ठरली आहे. भविष्यात अशा घटना टाळण्यासाठी आवश्यक उपाययोजना कराव्यात, अशीही मागणी प्रवासी संघटनांकडून करण्यात येत आहे.