महाराष्ट्र २४ ।। ऑनलाईन ।। विशेष प्रतिनिधी ।। दि. २७ फेब्रुवारी २०२६ ।। जळगावच्या सुवर्ण बाजारात गेल्या आठवडाभरापासून उसळीवर असलेले सोने-चांदीचे दर अखेर थोडे मवाळ झाले. १८ फेब्रुवारीपासून सोन्यात तब्बल ९ हजारांची, तर चांदीत ३२ हजारांची झेप घेतल्यानंतर गुरुवारी दर घसरल्याचे चित्र दिसले. चांदी प्रतिकिलो ५ हजारांनी कमी होऊन २ लाख ७५ हजारांवरून २ लाख ७० हजारांवर आली. तर सोने प्रतिदहा ग्रॅम ८०० रुपयांनी घसरून १ लाख ५९ हजार ८०० वरून १ लाख ५९ हजारांवर आले. आठवडाभराने मिळालेला हा दिलासा खरेदीदारांसाठी दिलखुलास बातमी ठरली आहे.
मागील काही महिन्यांपासून सुवर्ण बाजारात चढ-उतारांची मालिकाच सुरू आहे. तीन महिन्यांपूर्वी भाव विक्रमी पातळीवर गेले; त्यानंतर थोडी माघार घेतली असली तरी दर अजूनही सर्वसामान्यांच्या आवाक्याबाहेरच आहेत. चांदी पावणेतीन लाखांच्या घरात, तर सोने दीड लाखांच्या पुढे—अशी परिस्थिती आहे. लग्नसराईच्या तोंडावर भावातील ही घसरण तात्पुरती की आणखी मोठ्या बदलाची चाहूल, याकडे बाजाराचे लक्ष लागले आहे.
मागील १० दिवसांचा दरआढावा (प्रति १० ग्रॅम सोने / प्रति किलो चांदी)
१८ फेब्रुवारी: सोने ₹१,५२,५०० | चांदी ₹२,४३,०००
१९ फेब्रुवारी: सोने ₹१,५४,६०० | चांदी ₹२,५०,०००
२० फेब्रुवारी: सोने ₹१,५४,९०० | चांदी ₹२,५०,०००
२१ फेब्रुवारी: सोने ₹१,५७,००० | चांदी ₹२,६७,०००
२३ फेब्रुवारी: सोने ₹१,५८,००० | चांदी ₹२,७२,०००
२४ फेब्रुवारी: सोने ₹१,५९,००० | चांदी ₹२,७३,०००
२५ फेब्रुवारी: सोने ₹१,५९,८०० | चांदी ₹२,७५,०००
२६ फेब्रुवारी: सोने ₹१,५९,००० | चांदी ₹२,७०,०००
दरातील ही घसरण किती काळ टिकेल, हे आंतरराष्ट्रीय घडामोडींवर आणि डॉलरच्या चढ-उतारांवर अवलंबून राहणार आहे. मात्र सध्या तरी बाजारात ‘सोन्याचा श्वास’ थोडा सैल झाल्याचीच भावना व्यक्त होत आहे.