🔥 पुढील १२ तास धोक्याचे! महाराष्ट्रात उष्णतेची लाट, ‘या’ जिल्ह्यांना यलो अलर्ट

Spread the love

महाराष्ट्र २४ ।। ऑनलाईन ।। विशेष प्रतिनिधी ।। दि. ०४ मार्च २०२६ ।। राज्यात उन्हाळ्याचा पारा झपाट्याने चढू लागला असून पुढील १२ तास अत्यंत महत्त्वाचे ठरणार असल्याचा इशारा हवामान विभागाने दिला आहे. ४ मार्च रोजी राज्यात उष्ण आणि दमट हवामान राहण्याची शक्यता आहे. विदर्भातील अकोला येथे तापमान ३८ अंश सेल्सिअसपर्यंत पोहोचल्याची नोंद आहे. उष्णतेच्या लाटेच्या पूर्वसूचना लक्षात घेता नागरिकांनी दुपारच्या वेळेत बाहेर पडताना विशेष काळजी घ्यावी, असे आवाहन करण्यात आले आहे.

मुंबई, ठाणे, रायगड, रत्नागिरी आणि सिंधुदुर्ग जिल्ह्यांत उष्ण व दमट वातावरण राहील. मुंबईत कमाल तापमान ३३ ते ३७ अंशांच्या दरम्यान, तर किमान तापमान सुमारे २२ अंश राहण्याचा अंदाज आहे. आर्द्रता जास्त असल्याने उकाडा अधिक तीव्र जाणवेल. आज मुंबई, ठाणे, पालघर आणि रायगड जिल्ह्यांना यलो अलर्ट जारी करण्यात आला आहे. पश्चिम महाराष्ट्रातील पुणे, सातारा, सांगली आणि कोल्हापूर येथे कोरडे आणि उष्ण हवामान राहील. पुण्यात कमाल तापमान ३२ ते ३५ अंशांदरम्यान राहण्याची शक्यता आहे.

उत्तर महाराष्ट्रातील नाशिक, धुळे, जळगाव आणि नंदुरबार येथेही तापमान वाढ कायम राहील. मराठवाड्यातील छत्रपती संभाजीनगर, लातूर, नांदेड आदी भागांत कमाल तापमान ३४ ते ३७ अंशांपर्यंत जाईल. विदर्भातील नागपूर, अमरावती, चंद्रपूर आणि गडचिरोली येथे सर्वाधिक उष्णता जाणवणार आहे. नागरिकांनी भरपूर पाणी पिणे, दुपारच्या उन्हात बाहेर जाणे टाळणे आणि उष्माघाताच्या लक्षणांकडे दुर्लक्ष न करणे—हीच सध्या सुरक्षिततेची गुरुकिल्ली ठरणार आहे.