🛢️ युद्धाची ठिणगी, बाजारात धग! तेल महाग, डॉलर मजबूत; सोन्याची चमक फिकी

Spread the love

✍️ महाराष्ट्र २४ ।। ऑनलाईन ।। विशेष प्रतिनिधी ।। दि. ९ मार्च २०२६ ।। मध्यपूर्वेत पेटलेल्या युद्धाच्या ज्वाळा आता जागतिक अर्थव्यवस्थेलाही चाटू लागल्या आहेत. इस्रायल आणि इराण यांच्यातील संघर्षामुळे जगभरातील ऊर्जा बाजार अस्थिर झाले असून कच्च्या तेलाच्या किंमतीने थेट शंभरी ओलांडली आहे. गेल्या दहा दिवसांपासून सुरू असलेल्या तणावामुळे तेल पुरवठ्याची साखळी विस्कळीत झाली असून बाजारात अनिश्चिततेचे ढग दाटले आहेत. जागतिक बाजारपेठेतील व्यवहारानुसार कच्च्या तेलाचा दर तब्बल १०७ डॉलर प्रति बॅरलपर्यंत पोहोचला आहे. दुसरीकडे डब्ल्यूटीआय क्रूड ऑइलही १०६ डॉलरच्या पुढे गेल्याने ऊर्जा बाजारात खळबळ उडाली आहे. होर्मुझ सामुद्रधुनी काही काळासाठी बंद झाल्याने आखाती देशांतून होणाऱ्या तेल वाहतुकीवर मोठा परिणाम झाला. जगातील जवळपास २० टक्के तेल या मार्गाने वाहतूक होते. त्यामुळे या मार्गातील अडथळ्याने जागतिक बाजारात भीतीचे वातावरण निर्माण झाले आहे.

युद्धाच्या या छायेत अमेरिकन डॉलर मात्र अधिक मजबूत होताना दिसत आहे. जागतिक गुंतवणूकदार सुरक्षित पर्याय शोधत असल्याने डॉलरकडे त्यांचा कल वाढला आहे. ब्लूमबर्ग डॉलर स्पॉट इंडेक्समध्ये वाढ नोंदवली गेली असून गेल्या आठवड्यात १.३ टक्के वाढ झाल्यानंतर आजही त्यात ०.४ टक्क्यांची तेजी दिसून आली. डॉलर मजबूत होताच जगभरात महागाई वाढण्याची भीती व्यक्त केली जात आहे. तेलाच्या दरवाढीचा परिणाम वाहतूक, उद्योग आणि इंधनावर होणार असल्याने अनेक देशांमध्ये महागाईचा दबाव वाढू शकतो. अमेरिकेतही महागाईचा भडका उडण्याची शक्यता व्यक्त केली जात असून त्यामुळे फेडरल रिझर्व्हकडून व्याजदर कपातीची अपेक्षा धूसर होत चालली आहे.

दरम्यान, युद्धाच्या पार्श्वभूमीवर नेहमी सुरक्षित गुंतवणूक मानल्या जाणाऱ्या सोन्याची चमक मात्र काहीशी फिकी पडताना दिसत आहे. सिंगापूरमध्ये स्पॉट गोल्डमध्ये जवळपास ०.९ टक्क्यांची घसरण नोंदवली गेली असून सोन्याचा दर प्रति औंस सुमारे ५१२० डॉलरपर्यंत खाली आला आहे. त्यानुसार २८.३४ ग्रॅम सोन्याची किंमत सुमारे ४ लाख ७२ हजार रुपयांवर गेली असून प्रति तोळा दर अंदाजे १ लाख ६६ हजार रुपयांच्या आसपास पोहोचला आहे. चांदीच्या दरात १.६ टक्क्यांची घसरण झाली असून प्लॅटिनममध्येही ३ टक्क्यांची घट दिसून आली आहे. व्याजदर वाढणे आणि डॉलर मजबूत होणे हे सोने-चांदीसारख्या धातूंसाठी नकारात्मक ठरते, असे तज्ज्ञांचे मत आहे. याच पार्श्वभूमीवर शेअर बाजारातही अस्थिरता वाढली असून गुंतवणूकदारांमध्ये सावधगिरीचे वातावरण निर्माण झाले आहे. तरीही २०२६ या वर्षात आतापर्यंत सोन्याने गुंतवणूकदारांना जवळपास २० टक्क्यांचा परतावा दिल्याने त्याची दीर्घकालीन चमक अजूनही टिकून असल्याचे तज्ज्ञ सांगत आहेत.