💰 सोनं आणखी स्वस्त ! MCX बाजारात मोठी घसरण; चांदीचाही दर कोसळला

Spread the love

✍️ महाराष्ट्र २४ ।। ऑनलाईन ।। विशेष प्रतिनिधी ।। दि. ९ मार्च २०२६ ।। गेल्या आठवड्यात मोठ्या चढ-उतारांचा अनुभव घेतल्यानंतर आठवड्याच्या सुरुवातीलाच सोन्याच्या दरात पुन्हा एकदा घसरण पाहायला मिळाली आहे. मध्यपूर्वेत वाढत असलेल्या तणावामुळे जागतिक बाजारात अनिश्चिततेचे वातावरण निर्माण झाले असून त्याचा थेट परिणाम सोने-चांदीच्या दरांवर दिसून येत आहे. अमेरिका आणि इस्रायलने इराणवर केलेल्या हल्ल्यानंतर जागतिक बाजारात गुंतवणूकदार सावध झाले असून सोने बाजारात मोठ्या प्रमाणावर अस्थिरता निर्माण झाली आहे. मात्र आजच्या घसरणीमुळे सर्वसामान्य ग्राहकांना काहीसा दिलासा मिळाल्याचे चित्र आहे.

कमोडिटी बाजारातही आज सोन्याच्या दरात मोठी घसरण नोंदवली गेली. मल्टी कमोडिटी एक्सचेंज (MCX) मध्ये एप्रिल फ्युचर्स सोन्याचा भाव तब्बल १६०० रुपयांनी घसरून प्रति १० ग्रॅम १,६०,६५१ रुपयांवर व्यवहार करत होता. त्याचप्रमाणे मे फ्युचर्स चांदीच्या दरातही मोठी घट दिसून आली असून चांदीचा भाव ७,६०० रुपयांनी घसरून प्रति किलो २,६०,४९७ रुपयांवर पोहोचला आहे. गेल्या काही दिवसांत सोन्याने मोठी उसळी घेतल्यानंतर आजची ही घसरण बाजारातील अस्थिरतेचे स्पष्ट संकेत देत असल्याचे तज्ज्ञांचे मत आहे.

सराफा बाजारातही सोन्याच्या किंमतीत घसरण झाली आहे. Goodreturns च्या आकडेवारीनुसार, दिल्लीमध्ये २४ कॅरेट सोन्याचा भाव १,९७० रुपयांनी घसरून प्रति १० ग्रॅम १,६१,८३० रुपयांवर आला आहे. २२ कॅरेट सोन्याचा भाव प्रति १० ग्रॅम १,४८,३५० रुपये असून १८ कॅरेट सोनं १,२१,४१० रुपयांवर विकले जात आहे. दरम्यान, चांदीच्या दरातही मोठी घसरण झाली असून दिल्लीमध्ये चांदीचा भाव आज ५ हजार रुपयांनी कमी होऊन प्रति किलो २,८०,००० रुपयांवर आला आहे. मुंबई आणि कोलकाता या शहरांमध्येही चांदीचे दर जवळपास समान आहेत.

महाराष्ट्रातील प्रमुख शहरांमध्येही सोन्याच्या किंमतीत घट झाली आहे. मुंबई, पुणे, नागपूर, कोल्हापूर, अमरावती आणि जळगाव येथे २४ कॅरेट सोन्याचा दर प्रति तोळा सुमारे १,६१,६८० रुपयांवर पोहोचला आहे. २२ कॅरेट सोन्याचा भाव प्रति तोळा १,४८,२०० रुपये असून प्रति ग्रॅम दर १४,८२० रुपये इतका आहे. तर १८ कॅरेट सोन्याचा दर प्रति तोळा १,२१,२६० रुपये आहे. राज्यात चांदीचा भाव सध्या प्रति किलो २,८०,००० रुपयांच्या आसपास आहे. दरातील या घसरणीमुळे लग्नसराई आणि गुंतवणुकीसाठी सोने खरेदी करणाऱ्यांसाठी ही संधी मानली जात आहे.