✍️ महाराष्ट्र २४ ।। ऑनलाईन ।। विशेष प्रतिनिधी ।। दि. २५ एप्रिल २०२६ ।। Pune Latest News: पुण्याच्या वाढत्या विस्ताराला गती देण्यासाठी मेट्रो आता शहराच्या चौकटीबाहेर जाण्याच्या तयारीत आहे. Pune Metro चा विस्तार थेट उपनगरांपलीकडे—डोणजे, लोणीकंद ते खेड शिवापूरपर्यंत नेण्याचा प्रस्ताव मंजूर झाल्याने शहर नियोजनात मोठी हालचाल सुरू झाली आहे. Pune Municipal Corporation च्या सभागृहात हा प्रस्ताव मंजूर करताना नगरसेवकांनी ‘भविष्यातील पुणे’ डोळ्यासमोर ठेवले, मात्र सध्या सुरू असलेल्या मर्यादित मार्गांवरूनच सेवा व्यवस्थित चालतेय का, हा प्रश्नही उपस्थित होत आहे. कात्रज, उंड्री, खडकवासला, वाघोली अशा वेगाने वाढणाऱ्या भागांना मेट्रोची जोड देण्याचा हा प्रयत्न आहे.
या विस्तारात चार महत्त्वाचे मार्ग समोर आले आहेत—कात्रज ते खेड शिवापूर, खडकवासला ते डोणजे, वाघोली ते लोणीकंद आणि कात्रज ते उंड्री. विशेषतः पर्यटनदृष्ट्या महत्त्वाच्या सिंहगड-पानशेत परिसरात जाणाऱ्या नागरिकांची संख्या लक्षात घेता खडकवासला-डोणजे मार्गावर भर दिला जातोय. तर वाघोली-लोणीकंद मार्गामुळे पूर्व भागातील वाढत्या वसाहतींना मोठा दिलासा मिळू शकतो. मात्र हे सर्व प्रस्ताव कागदावर जितके आकर्षक दिसतात, तितकेच प्रत्यक्षात उतरवताना आर्थिक, तांत्रिक आणि पर्यावरणीय अडथळे उभे राहण्याची शक्यता नाकारता येत नाही.
एकीकडे शहराची वाढती लोकसंख्या आणि वाहतूक कोंडी यावर उपाय म्हणून मेट्रोचा विस्तार गरजेचा वाटतो, तर दुसरीकडे आधीच मंजुरीच्या प्रतिक्षेत असलेले प्रकल्प आणि निधीचा प्रश्न डोके वर काढतो. त्यामुळे ‘मेट्रो गावाकडे’ हा विचार उत्साहवर्धक असला तरी त्याची अंमलबजावणी कितपत शक्य होईल, हे पुढील काळात स्पष्ट होणार आहे. पुणेकरांना मात्र एकच अपेक्षा—घोषणांपेक्षा प्रत्यक्ष धावणाऱ्या गाड्या अधिक महत्त्वाच्या!