महाराष्ट्र २४ – ऑनलाईन – विशेष प्रतिनिधी – दि.८ मार्च –कोव्हिडचा वाढता प्रादुर्भाव आणि त्यातच वैद्यकीय महाविद्यालयांतील विद्यार्थ्यांना झालेला संसर्ग पाहता एमबीबीएस अंतिम वर्षाची परीक्षा ऑनलाइन पद्धतीने घेण्यात यावी, ही विद्यार्थ्यांची मागणी आरोग्य विद्यापीठाने फेटाळली. सोमवार ८ मार्चपासून एमबीबीएस अंतिम वर्षाच्या परीक्षेला ऑफलाइन पद्धतीने सुरुवात होणार आहे.
नागपुरात शासकीय वैद्यकीय महाविद्यालय व रुग्णालयातील (मेडिकल) २००, मेयोतील १५० व लता मंगेशकर हॉस्पिटलमधील १५० विद्यार्थी या परीक्षेला बसणार आहेत. सध्या मेडिकलमध्ये ४२ डॉक्टर विद्यार्थी करोना पॉझिटिव्ह आहेत. अकोला येथे तर तब्बल ८९ विद्यार्थ्यांना लागण झाली आहे. मेयो हॉस्पिटलमध्ये अशीच परिस्थिती आहे. यातील अनेक विद्यार्थ्यांवर उपचार सुरू आहेत, तर काही विलगीकरणात आहेत. अशा परिस्थितीत हे विद्यार्थी परीक्षा केंद्रावर जाऊन परीक्षा कशी देऊ शकतील, असा या विद्यार्थ्यांचा सवाल होता. परीक्षाच असल्यामुळे प्रत्येकाला केंद्रावर यावेच लागेल. यातील बाधित विद्यार्थ्यांपासून इतर विद्यार्थ्यांना संसर्ग झाल्यास त्याची जबादारी कोण घेणार, असे या विद्यार्थ्यांचे म्हणणे होते. वास्तविक ही परीक्षा नोव्हेंबर-२०२० मध्येच होणार होती. मात्र, कोव्हिडच्या प्रादुर्भावामुळे ती आता मार्चमध्ये घेण्यात येत आहे. जे विद्यार्थी कोव्हिडमुळे ऑफलाइन परीक्षेला बसू शकणार नाहीत, त्यांचे वर्ष वाया जाऊ शकते. त्यामुळे विद्यार्थ्यांच्या सुरक्षेचा विचार करून ही परीक्षा ऑनलाइन पद्धतीनेच घेण्याची त्यांची मागणी होती. याबाबत विद्यार्थ्यांनी सरकारला तसेच विद्यापीठाला निवेदन दिले होते. मात्र, या परीक्षेची काही केंद्रे ग्रामीण भागातही आहेत. ऑनलाइन परीक्षा घेतली तर तेथे नेटवर्कची समस्या येऊन परीक्षेत खंड पडू शकतो. त्यामुळे ही परीक्षा ऑनलाइन घेता येणार नाही, असे विद्यापीठातर्फे स्पष्ट करण्यात आले.