महाराष्ट्र २४ । विशेष प्रतिनिधी । दि १ फेब्रुवारी । एकीकडे केंद्रीय अर्थसंकल्प २०२२ सादर झाला असताना याच दरम्यान दुसरीकडे सोन्याच्या दरात काही प्रमाणात तेजी आली. तर चांदीच्या दरात घसरण झाली. सराफा बाजारात २४ कॅरेट प्रति १० ग्रॅम सोन्याचा भाव ४७,९७६ रुपयांवर पोहोचला. काल सोमवारी हा दर ४७,८३४ रुपयांवर बंद झाला. आज बाजारात त्यात तेजी दिसून आली. दरम्यान, आज चांदीचा प्रति किलो दर ६०,९९६ रुपयांवर आला आहे. काल सोमवारी चांदीचा दर ६१,०७४ रुपयांवर जाऊन बंद झाला होता.
इंडियन बुलियन अँड ज्वेलर्स असोसिएशनच्या माहितीनुसार, २४ कॅरेट सोने ४७,९७६ रुपये, २३ कॅरेट सोने ४७,७८४ रुपये, २२ कॅरेट सोने ४३,९४६ रुपये, १८ कॅरेट सोने ३५,९८२ रुपये तर १४ कॅरेट सोन्याचा दर २८,०६६ रुपये आहे. (हे दुपारी २ पर्यंतचे अपडेटेड दर आहेत. त्यात बदल होऊ शकतो)
दरम्यान, केंद्रीय अर्थसंकल्प २०२२ सादर होण्यापूर्वी (Union Budget 2022) मंगळवारी सकाळी सोन्याचा दर (Gold Price Today) स्थिर पातळीवर खुला झाला. एमसीएक्सवर (Multi Commodity Exchange) सोने प्रति १० ग्रॅम ४७,६५० रुपयांवर होते. याआधीच्या दिवशीच्या तुलनेत सोन्याचा दर किंचित वर असल्याचे दिसून आले. आंतरराष्ट्रीय पातळीवर सोन्याचे दर स्थिर आहेत.
२०२० मध्ये सोने दरात मोठी तेजी आली होती. दोन वर्षापूर्वी सोन्याच्या दराने ५६,२०० रुपयांपर्यंत उसळी घेत उच्चांक गाठला होता. पण २०२१ मधील ऑगस्टमध्ये सोने ४८ हजार रुपयांवर आले. त्यानंतर दरात चढ-उतार सुरुच आहे.
