महाराष्ट्र २४ । विशेष प्रतिनिधी । दि.९ एप्रिल । राष्ट्रवादीचे अध्यक्ष शरद पवार यांच्या घरावर झालेल्या हल्ल्यानंतर उपमुख्यमंत्री अजित पवार यांनी प्रतिक्रिया दिली आहे. ‘हा हल्ला म्हणजे पोलीस यंत्रणेचे अपयश असल्याचे अजित पवार यांनी म्हटले आहे. अजित पवार यावेळी म्हणाले की, मला आश्चर्य वाटते की दोन दिवसांपूर्वी न्यायालयाच्या निकालानंतर आंदोलन यशस्वी झाले म्हणून गुलाल उधळण्यात आला. मग कर्मचाऱ्यांचा सिल्व्हर ओकवर जाण्याचा काय उद्देश होता. पोलीस यंत्रणेचे हे अपयश आहे. पोलिसांना हे आधी कसे कळले नाही. तिथे जाणारे आंदोलक मीडियाला घेऊन पोहचले. अर्थात मीडियाचे हे कामच आहे की जे आहे ते दाखवणे. मग जे मीडियाला कळले, ते पोलीस यंत्रणेला का कळले नाही.
अजित पवार पुढे म्हणाले की, या मागच्या सूत्रधाराचा पोलीस विभाग शोध घेतील. एसटी कर्मचाऱ्यांची माथी भडकवण्यात आली. त्यामागे कोण आहे, याचा पोलीस शोध घेत आहे. गृहमंत्री दिलीप वळसे पाटील यांनी पोलीस अधिकाऱ्यांसोबत बैठक घेतली असून आम्ही आंदोलकांसोबत आणि संघटनांसोबत अनेकदा बैठकी घेतल्या आहे. पण त्यानंतरही एसटी कर्मचारी संघटनांचे देखील ऐकत नाहीत. त्यांनी तारतम्य सोडले, जी भाषा वापरण्यात आली, ती आपल्या संस्कृतीत बसत नाही. पोलीस यंत्रणा याचा तपास करुन यामागे कोण मास्टरमाईंड आहे याचा शोध घेतील.
शुक्रवारी राष्ट्रवादी काँग्रेसचे अध्यक्ष शरद पवार यांच्या सिल्वर ओक येथील निवासस्थानाबाहेर आझाद मैदानावर आंदोलनासाठी बसलेल्या एसटी कर्मचाऱ्यांनी आंदोलन केले. यावेळी आंदोलकांनी दगडफेक आणि चप्पलफेक करत गोंधळ घातला. कर्मचाऱ्यांच्या या आंदोलनानंतर तणावाचे वातावरण निर्माण झाले असून पोलिसांनी मध्यरात्री आझाद मैदानात बसलेल्या एसटी कर्मचाऱ्यांना बाहेर काढले आहे. आता या आंदोलकांनी सीएसएमटी रेल्वे स्थानकात ठिय्या दिला आहे.
गावदेवी पोलिसांनी अॅड. गुणरत्न सदावर्ते यांना शरद पवार यांच्या घरावर हल्ला प्रकरणी शुक्रवारी अटक केली. रात्री अकरा वाजता त्यांना वैद्यकीय तपासणीसाठी आधी नायर आणि मग जे.जे. रुग्णालयात नेण्यात आले. जे.जे. मध्ये सुमारे चार तास त्यांची मेडिकल करण्यात आली. त्यांना पोलिसांनी रात्रभर माध्यमांसमोर येण्यापासून रोखण्याचा प्रयत्न केला. यामुळे त्यांच्या कुटुंबियांनी संताप व्यक्त केला आहे. आज सदावर्ते यांना अकरा वाजताच्या दरम्यान न्यायालयात हजर करणार असल्याची माहिती सदावर्ते यांची पत्नी जयश्री पाटील यांनी दिली आहे.