महाराष्ट्र २४ । विशेष प्रतिनिधी । दि. २० ऑगस्ट । पंढरपूर । महाराष्ट्राची सांस्कृतिक ओळख आणि परंपरा असलेल्या दहिहंडीच्या (गोविंदा) ‘प्रो गोविंदा’ स्पर्धा घेण्याची घोषणा मुख्यमंत्री एकनाथ शिंदे यांनी विधानसभेत केली. कोरोना संसर्गाच्या कारणाने तब्बल दोन वर्षांनी दहीहंडी साजरी होत असल्याने यंदाच्या महोत्सवाचा मोठा जल्लोष राज्यभरात पाहायला मिळत आहे. काल दहीहंडीच्या पूर्वसंध्येला मुख्यमंत्री एकनाथ शिंदे यांनी गोविंदांसाठी मोठी घोषणा करताना प्रो-गोविंदा स्पर्धा सरकारच्या वतीने भरवणार असल्याचं जाहीर केलं. स्पर्धेसाठी बक्षीसाची रक्कम शासनातर्फे देण्यात येईल. त्याचबरोबर खेळाडू संवर्गातून विजेत्यांना शासकीय नोकरी देण्यात येईल, असेही मुख्यमंत्री म्हणाले. मुख्यमंत्र्यांच्या या घोषणेनंतर मात्र विविध स्तरांतून शासन निर्णायाचा विरोध होऊ लागला आहे.
कष्ट करुन अभ्यास करणाऱ्या ग्रामीण भागातील सर्वसामान्य विद्यार्थ्यांवर अन्याय करणारा हा निर्णय असून तो तातडीने मागे घ्यावा नाहीतर राज्यभरात तीव्र आंदोलन केले जाईल, असा इशारा देत राष्ट्रवादी युवक काँग्रेसचे सचिव श्रीकांत शिंदे यांनी मुख्यमंत्री एकनाथ शिंदे यांच्या सरकारने घेतलेल्या निर्णयाचा कडाडून विरोध केला.
राज्यात दहिहंडी, गणेश उत्सव, नवरात्रासारखे अनेक सण उत्सव साजरे केले जातात. परंतु असे उत्सव डोळ्यासमोर ठेवून जर सरकार तरुणांना नोकरी देणार असेल तर १२-१२ तास अभ्यास करुन स्पर्धा परीक्षा देणाऱ्या विद्यार्थ्यांचे काय? असा सवाल श्रीकांत शिंदे यांनी उपस्थित केला आहे.
सरकारच्या या निर्णयामुळे अभ्यास करणाऱ्या विद्यार्थ्यांवर अन्याय होणार आहे. शिवाय ग्रामीण खेळांडूमध्ये नकारात्मकतेची भावना निर्माण होण्याची भीती आहे. सरकारने अभ्यास करुन यश मिळवणाऱ्या विद्यार्थ्यांचा अगोदर विचार करावा, असं म्हणत शिंदे सरकारने या निर्णायाचा गांभीर्याने फेरविचार करण्याची गरज आहे, असंही सरतेशेवटी श्रीकांत शिंदे म्हणाले.