महाराष्ट्र २४ । विशेष प्रतिनिधी । दि. २२ ऑगस्ट । काश्मिर खोऱ्यातील लेह-लडाख जिल्ह्यात वाहन अपघातात शहीद झालेल्या जवान वैभव संपतराव भोईटे यांना राजाळे येथे शासकीय इतमामात मानवंदना देत हजारो जनसमुदायाच्या उपस्थितीत साश्रुपूर्ण नयनांनी अखेरचा निरोप दिला. यावेळी त्यांच्या कुटुंबीयांनी केलेला आक्रोश हृदय हेलावणारा होता. हे दृश्य पाहून अनेकांना अश्रू अनावर झाले. भोईटे यांना वडील संपतराव भोईटे यांनी न कडेवर बसलेल्या दीड वर्षांची मुलगी हिंदवी यांनी अग्नी दिला.
लडाखमधील लेह जिल्ह्यात राजधानी लेहजवळ कॅरी गावातून जाणारे भारतीय लष्कराचे वाहन खोल दरीत कोसळून झालेल्या दुर्घटनेत नऊ जवानांचा मृत्यू झाला होता. या शहीद झालेल्या जवानांमध्ये राजाळे (ता. फलटण) येथील वैभव संपतराव भोईटे (वय २३) या जवानाचा समावेश असल्याचे वृत्त फलटण तालुक्यात व राजाळे या गावी समजताच तालुक्यावर शोककळा पसरली. राजाळे गावाने बाजारपेठ बंद ठेवली होती.
हुतात्मा वैभव भोईटे यांचे पार्थीव लेहवरुन दिल्ली, हैद्राबाद मार्गे पुणे येथे विमानाने आणण्यात आले. पुणे येथून विशेष वाहनातून राजाळे येथे आणण्यात आले. लोणंद ते फलटण व फलटण ते राजाळे या मार्गावरील प्रत्येक गावामध्ये रस्त्याच्या दुतर्फा व मध्यभागी रांगोळी काढण्यात आली होती. गावोगावी भोईटे यांना श्रध्दांजली वाहणारे फ्लेक्स लावले होते. राजाळे येथे भोईटे यांच्या पार्थिव सायंकाळी आठ वाजता आले. तेथून भोईटेवस्ती येथे फुलांनी सजविलेल्या ट्रॉलीतून साडेआठच्या सुमारास निवासस्थानी आणण्यात आले.
यावेळी वीर जवान वैभव भोईटे अमर रहे, भारत माता की जय, वंदे मातरम, जब तक सुरज चाँद रहेगा वैभव तेरा नाम रहेगा, इनक्लाब जिंदाबाद अशा घोषणांनी आसमंत निनादला. राजाळे येथून भोईटेवस्ती येथे त्यांच्या निवासस्थानी पार्थीव मुख दर्शनासाठी आणल्यानंतर त्यांची आई, वडील, पत्नी व कुटुंबीयांनी हंबरडा फोडला. यावेळी उपस्थित हजारो लोकांनाही अश्रू अनावर झाले होते.