महाराष्ट्र २४ ।। विशेष प्रतिनिधी ।। दि. ५ जुन ।। लोकसभा निवडणुकीचे निकाल नुकतेच जाहीर झाले. यात अनेक ठिकाणी महाविकास आघाडीने बाजी मारल्याचे पहायला मिळाले. मात्र मावळ लोकसभेत वेगळे चित्र दिसले. कारण महाविकास आघाडीचे उमेदवार असलेले संजोग वाघेरे यांच्या चिंचवड विधानसभा मतदारसंघातून श्रीरंग बारणे यांना चांगला लीड मिळाली. सुरुवातीपासून ते या विधानसभा मतदारसंघातून आघाडीवर होते. त्यामुळे बारणे यांना चिंचवडने तारले अशा चर्चा सुरू झाल्या आहेत. तर वाघेरे यांना त्यांच्याच बालेकिल्ल्यात पिछाडीवर राहिल्याचं बोललं जात आहे.
मावळ लोकसभा मतदारसंघ हा पुणे आणि मुंबईत विभागलेला आहे. त्यात पुण्यातील पिंपरी, चिंचवड, मावळ तर मुंबईत पनवेल, उरण, कर्जत हे विधानसभा मतदारसंघ येतात. या सहा विधानसभा मतदारसंघात महायुतीचे आमदार आहेत. मात्र मावळ हा उद्धव ठाकरे यांच्या शिवसेनेचा बालेकिल्ला म्हणून ओळखला जातो. तसेच संजोग वाघेरे यांची लोकसभा निवडणूक जाहीर होण्याच्या आगोदरपासून उमेदवारी जाहीर करण्यात आली होती. त्यामुळे सुरुवातीपासूनच महाविकास आघाडीचे पारडे जड होते.
मात्र, जस जसा निकाल पुढे येत होता तसतशी चुरस वाढत होती. दिवंगत आमदार लक्ष्मण जगताप यांच्या चिंचवड विधानसभा मतदारसंघातून श्रीरंग बारणे यांना चांगले लीड मिळाल्याचे पहायला मिळाले. त्याने श्रीरंग बारणे यांच्या विजयामध्ये चिंचवड मतदारसंघाचे मोठे श्रेय असल्याचे पहायला मिळाले.
निकालात सुरुवातीपासूनच आघाडीवर असलेल्या श्रीरंग बारणे यांना वाघेरे यांना तशी चुरस देता आली नाही. कर्जत आणि उरण मतदारसंघात दोन्ही उमेदवारात कांटे की टक्कर पहायला मिळाली. मात्र नंतर श्रीरंग बारणे हे आघाडीवर गेल्याचे पाहायला मिळाले. त्यामुळे श्रीरंग बारणे यांना चिंचवड मतदारसंघाने तारले आहे.
चिंचवड विधानसभा
श्रीरंग बारणे – १ लाख ८६ हजार २३५
संजोग वाघेरे – १ लाख ११ हजार ४७० बारणे
आघाडी – ७४ हजार ७६५
पिंपरी विधानसभा
श्रीरंग बारणे – ९३ हजार ३२३
संजोग वाघेरे – ७६ हजार ५९२
बारणे आघाडी – १६ हजार ७३१
पनवेल विधानसभा मतदारसंघ
श्रीरंग बारणे – १ लाख ५० हजार ९२४
संजोग वाघेरे – १ लाख १९ हजार ८८६
बारणे आघाडी – ३१ हजार ३८
कर्जत विधानसभा
श्रीरंग बारणे – ७५ हजार ५३४
संजोग वाघेरे – ९३ हजार १९४
वाघेरे आघाडी – १७ हजार ६६०
उरण विधानसभा
श्रीरंग बारणे – ९१ हजार २८५
संजोग वाघेरे – १ लाख ४ हजार ५३५
वाघेरे आघाडी – १३ हजार २५०
मावळ विधानसभा
श्रीरंग बारणे – ९४ हजार ८००
संजोग वाघेरे – ८९ हजार ८३५
बारणे आघाडी – ४९३५