महाराष्ट्र २४ । विशेष प्रतिनिधी । दि. २६ ऑक्टोबर । ज्येष्ठ कीर्तनकार ह. भ. प. बाबामहाराज सातारकर यांचं निधन झालं. वयाच्या ८९ व्या वर्षी त्यांनी अखेरचा श्वास घेतला. नवी मुंबईतील नेरुळ येथे त्यांची प्राणज्योत मालवली. विशेष म्हणजे अवघ्या आठ महिन्यांपूर्वीच त्यांच्या अर्धांगिनी रुक्मिणी सातारकर यांचं निधन झालं होतं.
‘माई’ अर्थात रुक्मिणी सातारकर यांचं दोन फेब्रुवारी २०२३ रोजी निधन झालं. बाबामहाराज सातारकर यांच्या अध्यात्माच्या विचार प्रसाराच्या कार्यात त्यांनी सक्रीय योगदान दिलं होतं. आठ-नऊ महिन्यांच्या अंतराने दोघांनीही जगाचा निरोप घेतल्याने वारकरी संप्रदायात पोरकेपणाची भावना व्यक्त होत आहे. बाबामहाराज सातारकर यांच्या पार्थिवावर उद्या शुक्रवारी २७ ऑक्टोबरला संध्याकाळी पाच वाजता नेरुळ येथे अंत्यसंस्कार होणार आहेत. त्यांचं पार्थिव आज दुपारी तीननंतर अंत्यदर्शनासाठी नेरूळ जिमखाना समोर असलेल्या विठ्ठल रुक्मिणी मंदिरात ठेवण्यात येईल.
बाबामहाराज सातारकर यांनी आपलं आयुष्य अध्यात्माच्या प्रचार प्रसारासाठी अर्पण केलं. रोखठोक वाणी आणि शुद्ध विचार हे बाबा महाराज सातारकर यांचं व्रत होतं. कीर्तनाच्या माध्यमातून त्यांनी जनसामान्यांचं प्रबोधन केलं.