महाराष्ट्र २४ ई पेपर ।। विशेष प्रतिनिधी ।। शुक्रवार दि. ७ फेब्रुवारी ।। खराडी ते पुणे आंतरराष्ट्रीय विमानतळ, कात्रज ते हिंजवडी मेट्रो या मार्गांवर मेट्रो मार्ग सुरू करण्यासाठी सविस्तर प्रकल्प आराखडा (डीपीआर) तयार करण्याची सूचना हवाई वाहतूक राज्यमंत्री मुरलीधर मोहोळ यांनी महापालिका आणि महामेट्रोला केली आहे. त्यानुसार महापालिका ‘डीपीआर’ तयार करून केंद्र सरकारमार्फत राज्य सरकारला पाठविणार आहे. खराडी येथे ‘मल्टिमोड्यूल ट्रान्स्पोर्ट हब’ आणि भुसारी कॉलनीजवळही दुमजली उड्डाण पूल उभारता येतील का, याची चाचपणी करण्यास महापालिकेला सूचना करण्यात आली आहे.
मोहोळ तसेच महामेट्रोचे व्यवस्थापकीय संचालक श्रावण हर्डीकर आणि महापालिका आयुक्त राजेंद्र भोसले यांची बैठक झाली. त्यात शहरातील मेट्रो प्रकल्पासाठी नव्या मार्गांची सूचना मोहोळ यांनी केली. खडकवासला-स्वारगेट-हडपसर-खराडी या मंजूर मेट्रो मार्गात पुणे आंतरराष्ट्रीय विमानतळाचा समावेश करून तो मार्ग तेथून खराडी-हडपसर-स्वारगेट-खडकवासला असा करावा.
खराडी आणि परिसर हा व्यावसायिक संकुलांचा असून तेथे निवासी लोकसंख्या वेगाने वाढत आहे. त्यासाठी खराडी येथे मल्टीमोड्यूल हब झाल्यास पुणे विमानतळावर जाण्यासाठी मेट्रोच्या सर्व मार्गावरून जाण्याचा पर्याय उपलब्ध होणार आहे. चांदणी चौक तसेच निगडी ते स्वारगेट आणि हिंजवडी-शिवाजीनगर मार्गावरील प्रवाशांनाही थेट विमानतळावर पोचता येईल. शिवाय खडकवासला-स्वारगेट-हडपसर या मार्गावरील प्रवाशांनाही थेट विमानतळावर पोचता येईल. त्यासाठी खराडीमध्ये ट्रान्स्पोर्ट हब आवश्यक आहे.
महत्त्वाचे
कात्रज-चांदणी चौक ते हिंजवडी या मार्गावर मेट्रोचा विस्तार झाल्यास पुणे आणि पिंपरी-चिंचवड या दोन्ही शहरांसाठी मेट्रोचे वर्तुळाकार मार्ग होऊ शकतील.
वनाज ते चांदणी चौक हा मेट्रो मार्ग साकारताना तो दुमजली करावा, त्यामुळे येथील कोंडी कमी होईल.
नळस्टॉप येथील दुमजली उड्डाणपुलाचा प्रयोग यशस्वी झाला असून, वनाज ते चांदणी चौक या दरम्यानही दुमजली पूल होऊ शकतो.
पुणे शहराचा सर्वांगीण विकास होत असताना सार्वजनिक वाहतूक व्यवस्थेचे नियोजन भविष्याचा विचार करून करणे गरजेचे आहे. मोदी सरकारच्या आणि राज्य सरकारच्या भक्कम पाठिंब्यामुळे पुणे शहरात मेट्रोचे जाळे अधिक प्रमाणात विस्तारत आहे. मेट्रोच्या या विस्ताराचा अधिकाधिक पुणेकरांना फायदा व्हावा आणि शहरातील सर्व महत्त्वाचे भाग मेट्रोला जोडले जावेत, यासाठी सातत्याने प्रयत्न सुरू आहेत.
– मुरलीधर मोहोळ, केंद्रीय सहकार आणि नागरी हवाई वाहतूक राज्यमंत्री