महाराष्ट्र २४ ।। विशेष प्रतिनिधी ।। दि. २८ जुन ।। गेलया काही दिवसांपासून घाट विभागात मुसळधार पावसाने हजेरी लावली आहे. पुढील तीन दिवसही घाट विभागात मुसळधार पाऊस कायम राहणार आहे. त्यामुळे घाट विभागाला ‘ऑरेंज अलर्ट’ दिला असून, शहरात हलक्या पावसाची शक्यता भारतीय हवामानशास्त्र विभागाने व्यक्त केली आहे.
पुणे आणि परिसरात गेल्या काही दिवसांपासून पावसाने विश्रांती घेतली आहे. त्यामुळे कमाल तापमानातही वाढ झाली आहे. शुक्रवारी (ता. २७) शहरात २९ अंश सेल्सिअस इतके कमाल; तर २३ अंश सेल्सिअस किमान तापमान नोंदविण्यात आले. पुढील तीन ते चार दिवस कमाल तापमान स्थिर राहणार असून हलक्या ते मध्यम पावसाची शक्यता आहे.
पुणे आणि परिसरात शनिवारी (ता. २८) कमाल तापमान स्थिर राहून २९ अंश सेल्सिअस आणि किमान तापमान २३ अंश सेल्सिअस नोंदविण्यात येणार आहे. आकाश अंशतः ढगाळ राहणार असून हलक्या पावसाची शक्यता आहे. रविवारपर्यंत (ता. २९) कमाल तापमानात एकने वाढ होऊन ३० अंश सेल्सिअसपर्यंत नोंदविले जाईल. आकाश अंशतः ढगाळ राहून हलक्या पावसाची शक्यता वर्तविली आहे.