महाराष्ट्र २४ | विशेष प्रतिनिधी | दि. १ ऑक्टोबर | भारतीय हवामान विभागाने ऑक्टोबर महिन्यासाठीचा हवामान आणि पावसाचा दीर्घकालीन अंदाज जाहीर केला आहे. या अंदाजानुसार, ऑक्टोबर महिन्यात संपूर्ण देशात सरासरीपेक्षा अधिक पाऊस पडण्याची शक्यता आहे.
देशातील पावसाचा अंदाज
ऑक्टोबर २०२५ मध्ये: देशात सरासरीपेक्षा जास्त, म्हणजेच दीर्घकालीन सरासरीच्या ११५ टक्क्यांपेक्षा अधिक पाऊस पडण्याची शक्यता आहे. (ऑक्टोबर महिन्याची दीर्घकालीन सरासरी ७५.४ मिमी आहे.)
ईशान्य मान्सून (ऑक्टोबर ते डिसेंबर): या मान्सूनोत्तर हंगामातही देशाच्या अनेक भागांमध्ये सरासरीपेक्षा अधिक पाऊस पडेल. विशेषतः दक्षिण द्वीपकल्पीय प्रदेशात (तमिळनाडू, आंध्र प्रदेशचा किनारी भाग, रायलसीमा, केरळ आणि दक्षिण अंतर्गत कर्नाटक) सरासरीच्या ११२ टक्क्यांपेक्षा जास्त पाऊस पडण्याची शक्यता आहे.
मध्य भारत आणि पूर्वेकडील राज्यांमध्येही सरासरीपेक्षा अधिक पावसाचा अंदाज आहे.
वायव्य भारत आणि ईशान्येकडील काही भागांमध्ये मात्र सरासरी ते सरासरीपेक्षा कमी पाऊस पडू शकतो.
महाराष्ट्रावर काय परिणाम?
हवामान विभागाने दिलेल्या माहितीनुसार, ऑक्टोबर महिन्यात महाराष्ट्रातही सरासरीपेक्षा अधिक पाऊस पडण्याची शक्यता आहे.
विदर्भ, मध्य महाराष्ट्र आणि कोकण या भागांमध्ये सरासरीपेक्षा जास्त पाऊस होण्याची शक्यता अधिक आहे.
राज्यात सप्टेंबर महिन्यात झालेल्या परतीच्या आणि अतिवृष्टीच्या पावसामुळे शेती पिकांचे मोठे नुकसान झाले आहे. ऑक्टोबरमध्येही पावसाचा जोर कायम राहिल्यास शेतकऱ्यांची चिंता वाढण्याची शक्यता आहे.
तापमानाचा अंदाज
ऑक्टोबर महिन्यात देशाच्या पूर्व-ईशान्य आणि वायव्य भागातील कमाल तापमान सरासरीपेक्षा जास्त राहण्याची शक्यता आहे.
देशाच्या इतर भागांमध्ये कमाल तापमान सामान्य किंवा सामान्यपेक्षा कमी राहू शकते.