✍️ महाराष्ट्र २४ | विशेष प्रतिनिधी | दि. १५ नोव्हेंबर २०२५ – ‘महाराष्ट्राची जीवनवाहिनी’ म्हणून ओळख असलेली लालपरी आता नव्या धावपळीसाठी सज्ज होत आहे. प्रवासी संख्या, उत्पन्न आणि बससेवा सुधारण्यासाठी एसटी महामंडळ १ जानेवारीपासून राज्यभर बस स्थानकानिहाय नवे वेळापत्रक लागू करणार आहे.
पंचसूत्री आराखड्याला हिरवा कंदील
उत्पन्नवाढ आणि प्रवाशी सुविधा सुधारण्यासाठी एसटीने पंचसूत्री आराखडा तयार केला आहे. यासाठी मुंबई सेंट्रल मुख्यालयात झालेल्या उच्चस्तरीय बैठकीत
परिवहन मंत्री प्रताप सरनाईक उपाध्यक्ष डॉ. माधव कुसेकर प्रादेशिक व्यवस्थापक आणि विभाग नियंत्रक उपस्थित होते. या बैठकीत लांब पल्ल्याच्या समांतर धावणाऱ्या बसगाड्यांच्या वेळापत्रकावर प्रवाशांकडून येत असलेल्या तक्रारींचा गांभीर्याने विचार करण्यात आला. आता सर्व फेऱ्यांचे शास्त्रशुद्ध पुनर्मूल्यांकन होणार असून, मध्यवर्ती कार्यालयाची मंजुरी असलेल्या फेऱ्याच चालवल्या जातील.
प्रवाशांच्या तक्रारींवर तत्काळ कारवाई
एसटीने तक्रारींचा जलद निपटारा करण्यासाठी नवा नियम लागू केला आहे:
सकाळी 10 वाजता – आगारात बैठक
11 वाजता – विभागीय स्तरावर
12 वाजता – प्रादेशिक स्तरावर
या बैठकीत प्रवाशी तक्रारी, रद्द फेऱ्या, नादुरुस्त वाहने, गैरहजर कर्मचारी यांचे काटेकोर निरीक्षण करून तातडीने सुधारणा केली जाणार आहे.
लांब–मध्यम पल्ल्याच्या बससाठी नवे मापदंड
आरक्षणासाठी उपलब्ध बसांची संख्या वाढवणे
प्रत्येक फेरीचे किमान 80% भारमान निश्चित करणे
चांगले भारमान असलेल्या दिवशी जादा फेऱ्या उपलब्ध करणे
प्रत्येक फेरीवर सतत देखरेख
पर्यवेक्षकांना ‘दत्तक’ तत्त्वावर बस फेऱ्या देणे
तसंच, ऑनलाईन आणि मोबाईल अॅपद्वारे आरक्षणाला विशेष प्रोत्साहन देण्यात येणार आहे.