✍️ महाराष्ट्र २४ | विशेष प्रतिनिधी | दि. १८ नोव्हेंबर २०२५ | काही जिल्ह्यांमध्ये उद्भवलेल्या नैसर्गिक आपत्ती, महिलांनी उपस्थित केलेल्या अडचणींचा विचार करून मुख्यमंत्री माझी लाडकी बहीण योजनेच्या महिलांना ई-केवायसी प्रक्रियेसाठी 18 नोव्हेंबरऐवजी आता 31 डिसेंबर 2025 पर्यंत मुदत वाढवून देण्यात आली आहे.
महिला व बालविकासमंत्री आदिती तटकरे म्हणाल्या, नैसर्गिक आपत्तीमध्ये अनेक कुटुंबांचे मोठ्या प्रमाणावर नुकसान झाले आहे. काही महिलांच्या पती किंवा वडिलांचे निधन झाल्यामुळे संबंधित आधार क्रमांकावर ओटीपी प्राप्त होणे अशक्य झाले आहे. अशा परिस्थितीत अपूर्ण ई-केवायसी प्रक्रियेस मुदतवाढ देणे आवश्यक आहे. तसेच, ज्या पात्र महिलांचे पती किंवा वडील हयात नाहीत किंवा ज्या महिला घटस्फोटित आहेत, अशांनी स्वतःची ई-केवायसी प्रक्रिया पूर्ण करून संबंधित मृत्यू प्रमाणपत्र, घटस्फोट प्रमाणपत्र किंवा न्यायालयाचा आदेश यांची सत्यप्रत सादर करणे आवश्यक राहील.