✍️ महाराष्ट्र २४ | विशेष प्रतिनिधी | दि. १९ नोव्हेंबर २०२५ मुंबई | तब्बल तीन दिवसांपासून खंडित झालेला सीएनजी पुरवठा मंगळवारी दुपारी ३.३० वाजता पूर्णपणे पूर्ववत झाला. मात्र पुरवठा सुरू होताच रिक्षा, टॅक्सी आणि खासगी वाहनांची पंपांवर मोठी गर्दी झाली. अनेकांनी दोन ते तीन तास रांगेत उभे राहून सीएनजी भरणा केला.
कसा झाला बिघाड?
ट्रॉम्बे येथील महानगर गॅसच्या मुख्य पाइपलाइनला झालेल्या नुकसानीमुळे रविवारपासून मुंबईतील पंपांचा थेट पुरवठा बंद झाला होता. त्यामुळे रिक्षा, टॅक्सी, ऑनलाइन कॅब यांची सेवा मोठ्या प्रमाणात विस्कळीत झाली.
बेस्ट बस सेवा मात्र सुरळीत
बेस्टच्या ११०० पेक्षा अधिक सीएनजी बसांना महानगर गॅसने कमी दाबाने पुरवठा सुरू ठेवला. त्यामुळे बेस्ट सेवा थांबली नाही; मात्र बसस्टॉपवर प्रवाशांची प्रचंड गर्दी झाली.
ठाण्यातही मोठा फटका
ठाण्यातील तब्बल १३ सीएनजी केंद्रे ५० तासांनंतर सुरू झाली. चालकांना दोन ते तीन किलोमीटर लांब रांगेत थांबावे लागले. गेलच्या वडाळा आरसीएफ कंपाउंडमधील पाइपलाइन बिघाडामुळे संपूर्ण मुंबई-ठाण्यात गॅस तुटवडा निर्माण झाला होता.
मुंबईकरांनी टाकला सुटकेचा श्वास
पुरवठा कमी दाबाने का होईना, पण सुरू झाल्याने रिक्षा, टॅक्सी चालकांसह प्रवाशांनी सुटकेचा नि:श्वास टाकला. गेल्या २० वर्षांत पहिल्यांदाच असा मोठा बिघाड झाल्याची माहिती पंप अधिकाऱ्यांनी दिली.