✍️ महाराष्ट्र २४ | विशेष प्रतिनिधी | दि. २३ नोव्हेंबर २०२५ | तिरुपतीतील श्री वेंकटेश्वर मंदिराच्या प्रसाद म्हणून दिल्या जाणाऱ्या प्रसिद्ध ‘तिरुपती लाडू’मध्ये गेल्या काही वर्षांत मोठ्या प्रमाणावर भेसळ झाल्याचे नवे धक्कादायक तपशील समोर आले आहेत. २०१९ ते २०२४ या पाच वर्षांमध्ये मंदिराने भाविकांना एकूण ४७.७६ कोटी लाडू दिले. त्यापैकी तब्बल २० कोटी लाडू भेसळयुक्त तुपाचा वापर करून तयार केले गेले, अशी माहिती टीटीडी (तिरुमला तिरुपती देवस्थानम) ट्रस्ट बोर्डाचे अध्यक्ष बी. आर. नायडू यांनी दिली.
कशी उघड झाली भेसळ?
दररोजच्या भाविकांची संख्या, लाडूंचे उत्पादन, खरेदी व विक्री यांचा तुलनात्मक अभ्यास केला असता ही भेसळीची आकडेवारी समोर आली.
भक्तांसाठी पवित्र मानल्या जाणाऱ्या प्रसादात भेसळ झाल्याचे समजताच देशभरातून तीव्र नाराजी व्यक्त करण्यात आली होती.
काय म्हणतो एसआयटीचा तपास?
या प्रकरणाची चौकशी केंद्रीय अन्वेषण विभागाच्या नेतृत्वाखालील विशेष तपास पथक (SIT) करत आहे. SIT च्या तपासात पुढील बाबी स्पष्ट झाल्या—
अंदाजे ६८ लाख किलो भेसळयुक्त तूप मंदिराला पुरवलं गेलं.
या तुपाची किंमत जवळपास २५० कोटी रुपये होती.
या तुपात पाम तेल, पाम कर्नल तेल आणि इतर हानिकारक पदार्थ मिसळले होते.
हे तूप उत्तराखंडच्या ‘भोले बाबा डेअरी’ आणि त्यांच्या शेल कंपन्यांमार्फत पुरवण्यात आल्याचे आढळले.
या पाच वर्षांत तब्बल ११ कोटी भाविकांनी मंदिराला भेट दिली. या कालावधीत कोणत्या भाविकांना भेसळयुक्त लाडू मिळाले हे शोधण्याचा कोणताही अचूक मार्ग उपलब्ध नसल्याचेही SIT ने स्पष्ट केले. अगदी VVIP लाडूदेखील वेगळे ओळखता येत नसल्याचे टीटीडीने कबूल केले आहे.
अधिकाऱ्यांची चौकशी सुरू
SIT ने या प्रकरणात अनेक वरिष्ठ अधिकाऱ्यांची चौकशी केली आहे.
टीटीडीचे माजी अध्यक्ष आणि YSRCP खासदार वायव्ही सुब्बा रेड्डी यांची आठ तास चौकशी झाली.
त्यांच्या समोर भेसळीचे प्रयोगशाळेतील अहवाल ठेवले गेले होते का, याबाबत तपास पथकाने विचारणा केली.
सुब्बा रेड्डी यांनी मात्र हे अहवाल आपल्या निदर्शनास कधी आणले गेले नाहीत, असा दावा केला.
त्यांच्या माजी सहाय्यक चिन्ना अप्पाना यांना अटक करण्यात आली आहे.
टीटीडीचे माजी कार्यकारी अधिकारी एव्ही धर्मा रेड्डी यांची देखील चौकशी झाली आहे.
नेल्लोर न्यायालयात या तपासातील काही महत्त्वपूर्ण निरीक्षणे नोंदवण्यात आली असून १५ डिसेंबरपर्यंत पुरवणी आरोपपत्र दाखल होण्याची शक्यता आहे.