🌆 Pune Special : लंडन–न्यूयॉर्कची झलक आता पुण्यात! पहिल्यांदाच ‘ओपन गॅलरी बस’

✍️ महाराष्ट्र २४ | विशेष प्रतिनिधी | सोमवार १ डिसेंबर | पुणेकरांनो, तयार रहा! ज्या शहराला स्मार्ट बनवण्याचे आश्वासन वर्षानुवर्षे दिलं गेलं, ते शहर आता थेट लंडन–न्यूयॉर्कची झलक दाखवायला सज्ज होत आहे. पीएमपीएमएल लवकरच घेऊन येत आहे ‘ओपन गॅलरी बस’, म्हणजेच शहर फिरायचं पण छपरावर बसून – अगदी विदेशी अंदाजात!

पंकज देवरे यांच्या संकल्पनेतून तयार होणारी ही बस सध्या वर्कशॉपमध्ये आकार घेत आहे. पुण्यातील ऐतिहासिक किल्ले, जुन्या वाड्या, सांस्कृतिक ठाणं आणि बदलतं मॉडर्न पुणं… हे सगळं एका फेरीत, आकाशाखाली बसून पाहण्याची ही पहिलीच संधी. पर्यटन वाढेलच, पण पीएमपीच्या महसूलातही ‘ताजी हवा’ मिळणार हे नक्की.

🚌 पण… पुणे आहे साहेब, अडथळेही असतीलच!
बस सुरू करण्यापूर्वी मार्गावरील विद्युत तारा, झाडांच्या फांद्या, खांब… या सगळ्यांना “साईड प्लिज!” म्हणणं प्रशासनाला भागच आहे. कारण सध्या परिस्थिती अशी आहे की साधी सामान्य बसच फांद्यांना धडकते—ओपन बस तर थेट त्यांच्याशी हस्तांदोलनच करेल! त्यामुळे प्रवाशांचा आग्रह—“बस सुरू करा, आधी मार्ग साफ करा!”

✈️ दरम्यान… पुणे विमानतळाने मारली आंतरराष्ट्रीय झेप
मर्यादित उड्डाणं असूनही पुणे विमानतळ देशातल्या टॉप-20 मध्ये दाखल—एकदम 19वा क्रमांक! 2024 मध्ये तब्बल 10,663 विदेशी प्रवासी इथे उतरले. धावपट्टी वाढवण्याचा प्रस्तावही गतीत. म्हणजे बसवरून पुणं बघा आणि विमानाने पुणं जगाला दाखवा—दोन्हीकडून अपग्रेड सुरू!