✍️ महाराष्ट्र २४ | विशेष प्रतिनिधी | दिनांक १३ डिसेंबर २०२५ | सोने-चांदीच्या दरात पुन्हा एकदा मोठी उसळी पाहायला मिळत आहे. शुक्रवारी सोन्याच्या दरात २,१०० रुपयांची वाढ झाली असून, त्यामुळे १० ग्रॅम सोन्याचा दर १ लाख ३१ हजार ३०० रुपयांवर पोहोचला आहे. दुसरीकडे, चांदीने ऐतिहासिक टप्पा गाठत पहिल्यांदाच २ लाखांचा स्तर ओलांडला आहे.
चांदीचा दर ऐतिहासिक उच्चांकावर
चांदीच्या दरात एका दिवसात २,००० रुपयांची वाढ झाली असून, प्रति किलो दर १ लाख ९४ हजार रुपये झाला आहे. जीएसटीसह हा दर जवळपास २ लाख रुपयांपर्यंत पोहोचत आहे.
गेल्या एका वर्षात चांदीच्या दरात दुप्पट वाढ झाली आहे.
९ डिसेंबर: १,८०,००० रुपये
१० डिसेंबर: १,८८,००० रुपये
सध्या: १,९४,००० रुपये (GST सह जवळपास २ लाख)
फक्त आठ दिवसांत चांदी १५ हजार रुपयांपेक्षा अधिक महागली आहे.
६ महिन्यांत आणखी वाढीचा अंदाज
२०२४ च्या ऑक्टोबर-नोव्हेंबरमध्ये चांदीचा दर सुमारे १ लाख रुपये होता. अवघ्या वर्षभरात हा दर दुप्पट होऊन आता १.९९ लाखांच्या पुढे गेला आहे.
तज्ज्ञांच्या मते, येत्या सहा महिन्यांत चांदीच्या दरात आणखी ५० हजार रुपयांची वाढ होण्याची शक्यता नाकारता येत नाही. सध्या तरी सोने-चांदीचे दर घसरण्याची चिन्हे दिसत नसल्याचे मत व्यक्त केले जात आहे.
सोन्याचाही दर तेजीत
२४ कॅरेट सोन्याचे दरही विक्रमी पातळीवर आहेत—
दिल्ली: १० ग्रॅम – १,३३,३६० रुपये
मुंबई: १० ग्रॅम – १,३३,२१० रुपये
आंतरराष्ट्रीय बाजारात सोन्याचा दर ४,३३८.४० डॉलर प्रति औंस इतका आहे. भारतीय रुपयाच्या घसरणीमुळे आणि सुरक्षित गुंतवणूक म्हणून सोन्याकडे वाढलेल्या कलामुळे दरात वाढ होत असल्याचे तज्ज्ञांचे म्हणणे आहे.