✍️ महाराष्ट्र २४ | विशेष प्रतिनिधी | दिनांक : २८ डिसेंबर २०२५ | सध्या बाजारात एकच चर्चा आहे— चांदी कुठे थांबणार? गेल्या दीड महिन्यांपासून चांदीने अशी घोडदौड सुरू केली आहे की सोनंही थोडं बाजूला सरकून “मला पण घे” असं म्हणतंय! शनिवारी तर चांदीने एकाच दिवसात तब्बल १५ हजारांची उसळी घेत थेट अडीच लाखांचा टप्पा पार केला आणि गुंतवणूकदारांच्या डोळ्यात अक्षरशः चांदण्या चमकल्या.
जागतिक पातळीवर घडामोडींचा पारा चढलेला आहे. युद्धजन्य परिस्थिती, अमेरिकेकडून अर्थव्यवस्था आणि उद्योग क्षेत्रात घेतले जाणारे निर्णय, डॉलरची चढउतार—या सगळ्याचा थेट परिणाम मौल्यवान धातूंवर होत आहे. सुरक्षित गुंतवणुकीच्या शोधात गुंतवणूकदार पुन्हा एकदा सोने-चांदीकडे वळले आहेत. मात्र यावेळी चांदीने सोन्यापेक्षा आघाडी घेतल्याचं स्पष्ट दिसतंय.
पूर्वी चांदी म्हणजे “सोन्याची लहान बहीण” असं म्हटलं जायचं. पण आता हीच बहीण धावण्यात पुढे गेली आहे! औद्योगिक क्षेत्रात चांदीचा वाढलेला वापर—विशेषतः इलेक्ट्रॉनिक्स, सोलर पॅनल्स आणि नव्या तंत्रज्ञानात—यामुळे मागणी प्रचंड वाढली आहे. त्यातच गुंतवणुकीसाठी चांदी हा नवा, तुलनेने परवडणारा पर्याय ठरू लागल्याने खरेदीचा ओघ वाढत चालला आहे.
आकडे पाहिले तर ही झेप अधिकच ठळक होते. ११ डिसेंबर रोजी २४ कॅरेट सोने प्रतितोळा १ लाख ३२ हजार ५६० रुपये, २२ कॅरेट सोने १ लाख २१ हजार ९६० रुपये, तर चांदी प्रतिकिलो १ लाख ९४ हजार ६७० रुपये होती. अवघ्या पंधरा दिवसांत चित्र पूर्ण बदललं. २६ डिसेंबरला चांदी २ लाख ३६ हजार ९०० रुपये झाली आणि दुसऱ्याच दिवशी थेट २ लाख ५३ हजार ९०० रुपये प्रतिकिलोवर पोहोचली. म्हणजे पंधरवड्यात चांदीने जवळपास साठ हजारांची मजल मारली!
सोनंही मागे नाही. २७ डिसेंबरला २४ कॅरेट सोन्याचा दर १ लाख ४३ हजार ४८० रुपये, तर २२ कॅरेट सोनं १ लाख ३२ हजार रुपये प्रतितोळा इतकं पोहोचलं. चांदीच्या वेगवान धावण्यामुळे सोन्यालाही दरवाढीचा वेग पकडावा लागला आहे.
तज्ज्ञांच्या मते, सध्याची जागतिक अस्थिरता, औद्योगिक मागणी आणि गुंतवणूकदारांचा कल पाहता ही दरवाढ तात्पुरती नाही. म्हणजेच “आज महाग, उद्या स्वस्त” असा खेळ लगेच होणार नाही. उलट, पुढील काळातही सोने-चांदीचे दर चढतेच राहतील, असे संकेत मिळत आहेत.
थोडक्यात काय, ज्यांनी वेळेत चांदीत गुंतवणूक केली, त्यांच्या तिजोरीत सध्या चांदणं पडलं आहे. आणि ज्यांनी अजूनही “थांबूया जरा” असं म्हटलंय, त्यांनी आता एकच प्रश्न स्वतःला विचारावा— उद्या दर आणखी वाढले, तर?